Inhlanganiso ephathisa amazwe womhlaba wonke jikelele eyeGlobal Fund inika eleZimbabwe izigidi ezingamakhulu lanhlanu - $25 million yokuphathisa ugatsha lukahulumende lwezempilakahle ukuthi luvimbe ukumemetheka lokuthelelanwa komkhuhlane weCoronavirus COVID 19.
Imali le izanikwa eleZimbabwe phakathi kwamalanga amahlanu alandelayo.
Lokhu kwethulwe ngumqondisi weGlobal Fund, uDokotela Peter Sands,othi inhlanganiso yakhe iyasuthiseka ngendlela eleZimbabwe elisebenza ngayo ekuzameni ukumisa ukumemetheka kwegcikwane leCoronavirus.
Umphathintambo kahulumende obona ngezempilakahle, uDokotela Obadiah Moyo, utshele uSands ukuthi benza konke okusemandleni abo ukufundisa abezempilakahle labantu makhaza ngokuvikela umkhuhlane weCOVID-19.
Wengeze esithi kusukela ngoLwesine bazasungula uhlelo lokulimukisa abasemaphandleni ngalumkhuhlane.
Umphathintambo wedolobho lakoBulawayo, uNkosikazi Judith Ncube, uthi uyasuthiseka ngamalungiselelo okuphathwa komkhuhlane weCOVID-19 esibhedlela seThorngroove.
Umqondisi wezempilakahle esigabeni seMatabeleland North, uMnu. Purgie Chimberengwa, uthi benza konke okusemandleni abo ukuvikela ukumemetheka kweCOVID 19 kuzozonke indawo lapho izethekeli zelizwe ezingena khona zisiza eZimbabwe.
Ngeviki ezayo kulenhlanganiso ezehlukeneyo ezibikwa zizakuyabona ukuba sizobani olunganikwa isibhedlela esithenjiweyo eMaNdebeleni, iThorngroove Hospital, ukuze ilungele ukuhlola lokuphathwa kwalabo abangafunyanwa belegcikwane le Coronavirus-COVID19.
Okwamanje uhulumende uphakathi komhlangano edolobheni leKadoma leziphathamandla zogatsha lwempilakahle labenhlanganiso ezibona ngezempilakahle elizweni lapho abahlaziya khona umkhuhlane weCoronavirus osusabalala okumangalisayo emazweni womhlaba, ikakhulu kwele China lapho oqalele khona.
Kwele Zimbabwe akukabi lomuntu osefunyanwe elomkhuhlane lo. Uzulu weMaNdebeleni nguye osehlalele evalweni kulandela ukubanjwa kwalo umkhuhlane kwele South Africa ngoba inengi labantu kulo umhlubulo welizwe bavame ukuchapha umngcele besiya dinga imisebenzi kanye lokudla kulelolizwe.
