amalinks wokungena

Breaking News

Kambe Ilizwe leZimbabwe Lizimisele Na Ukuvimba Ukumemetheka Komkhuhlane weCoronavirus?


Kuhlolwa idawo yokugcina abalomkhuhlane weCoronavirus COVID-19 eWilkins Hospital eHarare. (VOA)

Bathithibele abantu ngokuqhamuka komkhuhlane weCoronavirus osubulele abantu abedlula inkulungwane ezilitshumi emhlabeni wonke jikelele. Abanengi bathi kabakwazi okuzabehlela eZimbabwe osokuqhamuke umkhuhlane lo.

Kulabanye abantu abathi uhulumende weZimbabwe kazimiselanga ukulwisana lomkhuhlane weCoronavirus kulandela okwethulwe ngamalunga edale lephalamende abona ngezempilakahle athi isibhedlela seThorngrove Isolation Hospital sikusimo esibi.

Omunye wabalombono lo nguMnu. Trymore Mpofu, omele ibandla leMDC elikhokhelwa nguMnu. Nelson Chamisa esigabeni sePlumtree, othi uhulumende ubona ntuntu ngomkhuhlane lo ngakho-ke uzulu kazivikele.

UMnu. Thembelani Moyo, ohlala eLupane, laye uthi kuyadanisa okwenziwa nguhulumende kaMongameli Emmerson Mnangagwa.

UMoyo uthi abantu kabenelisi lokuthenga isepa yokugeza izandla.

Kodwa-ke uMnu. Believe Gaule webandla leZanu PF uthi uhulumende uyakwazi akwenzayo. UGaule uthi abakhonona kakhulu ngabazonda uhulumende kaMnangagwa.

UMfundisi Maqhawe Ncube, odabuka eZimbabwe ohlala kwele South Africa, uthi lesi yisikhathi sokuthi abantu badonse ndawonye njalo bancede abaswelayo ngendlela ezitshiyeneyo.

UMfundisi Ncube uthi kumele uzulu athandaze kakhulu.

Uhulumende usemise imbuthano kazulu egoqela ukunanza usuku lukazibuse, umbukiso weZimbabwe International Trade Fair, imitshado elabantu abalikhulu leminye imicimbi esenzela ukuvimba ukumemetheka kwegcikwane leCoronavirus.

Facebook Forum

XS
SM
MD
LG