Umahluli wedale leHigh Court, uJustice Christopher Dube-Banda, uthi kuyethusa okwenziwa ngumsekeli kamongameli uRetired General Constantino Chiwenga owathuma ibutho ukuthi livumbe umkakhe, uMarry Mubaiwa, ukuba angene endlini yabo eBorrowdale Brooke eHarare esanda kuphiwa isibambiso sebail.
Lokhu ngokunye okukhulunywe nguDube-Banda eHigh Court ngoLwesihlanu ngesikhathi esethula isinqumo sakhe kudaba lokwaliswa kuka Marry Mubaiwa nguChiwenga ukuba angene endlini yabo njalo agcine abantwana babo abathathu.
UDube-Banda uthi akuvunyelwa emthethweni ukuba umsekeli kamongameli kumbe loba ngubani asebenzise ibutho ngendlela eyenziwa nguChiwenga owatshela amasotsha ukuthi avimbe umkakhe nxa efuna ukungena endlini yabo evela entilongweni lapho ayetheswa icala lokuzama ukubulala uChiwenga egula esibhedlela kwele South Africa nyakenye.
Intathelizindaba zeStudio 7 ziphenye amaphepha afakwe emthethwandaba zathola ukuthi uDube-Banda uthe kubi kakhulu okwenziwa nguChiwenga owayekhokhela ibutho leZimbabwe.
“Akuvunyelwa njalo kulihlazo lokhu ngoba kwephula isisekelo sombuso welizwe. Ungeke usebenzise ibutho ukwenzela ukulungisa okwemuli yakho. Kuyethusa lokhu. Okwenzakale kumama lo kumele kwethuse izizalwane zonke ezihlonipha imithetho yelizwe.”
UDube-Banda uthe eqeda ukwethula amazwi la wathi kumele uChiwenga avumele umkakhe ukuba angene endlini yabo, abisele abantwana kunina njalo amnike imota zonke ezigoqela eyohlobo lweMercedes Benz leLexus.
UChiwenga waqala ukwehlukana lomkakhe evela kwele China lapho ayeselatshwa khona umkhuhlane womphimbo. Wathi umyeni wakhe wayefuna ukumbulala esenzela ukuthola impahla yonke abalayo njalo wayesenza ukungethembeki okumangalisayo okugoqela ukusebenzisa imali okungekho emthethweni kwamanye amazwe.
Waphinda wathi umkakhe kathembeki ekondleni abantwana babo ngenxa yokuthi uyazitshaphaza ngendlela ezitshiyeneyo.
Kodwa uMarry Mubaiwa wathi umkakhe ulamanga ngoba nguye onatha izidakamizwa ezimenza alahlekelwe yingqondo kancane. Uyakuphikisa lokhu uChiwenga.