amalinks wokungena

Breaking News

Selimemetheka eZimbabwe Na Igciwane leCOVID-19 Eliqhamuke Kwele India?


Kubikwa ukuthi solumemetheka eZimbabwe uhlobo lweCOVID-19 oluqhamuke kwele India kulandela ukubhubha komuntu eKwekwe obevela kulelolizwe.

Iziphathamandla zekhansili yeKwekwe zibika ukuthi kulowesilisa obevela kwele India osebulewe ngumkhuhlane weCOVID-19.

Zithi sebehlolisisa ukumemetheka kwegciwane leli edolobheni leKwekwe, okukhanya engani sebembalwa abantu abalithaphileyo. Lokhu kuza ngesikhathi uhlangothi lwezempilakahle lusithi kulabantu abafika phose amatshumi amabili – 19 abahlolwe izolo batholakala belegciwane leli eZimbabwe.

Luthi akulamuntu obulewe ngumkhuhlane lo izolo. Luthi sokulabantu abafika phose inkulungwane ezingamakhulu ayisithupha – 579,769 asebehlatshwe okwakuqala ijekiseni yokuzivikela kumkhuhlane lo kuthi njalo abantu abedlula kancane inkulungwane ezingamakhulu amabili – 231,542 sebehlatshwe okwesibili amajekiseni atshiyeneyo asetshenziswa elizweni.

Ukumemetheka kwegciwane eliqhamuke kwele India kwethusa abantu abanengi. Umeya wedolobho leKwekwe uthi basahlolisisa isimo segciwane elibulele umuntu wakuleyondawo obevela kwele India.

Banengi abantu eZimbabwe asebedlela evalweni kulandela ukubhubha kowesilisa eKwekwe. okuthiwa wathapha igciwane leCOVID-19 kwele India. Omunye wabethukileyo nguMnu. Melusi Phiri.

“Kuyasethusa kakhulu lapha eZimbabwe ukuzwa ukuthi umhlobo we-virus lo osubulele abantu abanengi kwele India usutholakala njalo lapha ngoba lapha eZimbabwe, ihealth situation lapha emakilinika langaphi ngaphi, asilungelanga ukuthi singalwisana layo le-virus. Ingasiqeda kakhulu okunye okwamagama.”

Ingcwethi kwezempilakahle okunkampani yeGamma Medical Laboratories, uSikhwicamfundo Elopy Sibanda, uthi abantu kumele balandele iziqondiso zomthetho owethulwa yinhlanganiso yeWorld Health Organization ukwenzela ukuzivikela kumkhuhlane weCOVID-19.

Kulabantu abafika phose inkulungwane ezingamatshumi amane – 38,554 asebehlolwe batholakala bele COVID-19 eZimbabwe kusukela ngoMbimbitho nyakenye, kwaphepha abedlula kancane inkulungwane ezingamatshumi amathathu lasithupha – 36,318. Sokwabhubha abedlula inkulungwane lengxenye – 1,582.

Udaba Esilethulelwe NguMavis Gama
please wait

No media source currently available

0:00 0:03:39 0:00


Facebook Forum

XS
SM
MD
LG