Isikhulumi sikahulumende, uMnu. Nick Mangwana, ubika ukuba uMongameli Emmerson Mnangagwa usengezelele ukusebenza kweziqondiso zeCovid-19 Lockdown ngamaviki amabili ngesikhathi inani labahlolwa betholakala beleCoronavirus liqansa eZimbabwe mihla ngemihla.
UMangwana ulobe enkundleni yokuxumana eyeTwitter ethi abasebenzela emahofisini kahulumende umsebenzi usuzakwehliswa uye kusilinganiso sokungamatshumi amathathu ekhulwini-30%. Amawetela lezindlu ezizimeleyo ezokulala sebezatholisa usizo umuntu esedlini ayibhadalelayo kuphela kuthi lapho okudlelwa khona lokunathelwa khona akusamelanga kubuthane abantu.
Lokhu kuhle kwadanisa abanengi abakade sebelungiselela ikhefu lekhisimusi lelokwamukela umnyaka omutsha.
Isakhamuzi sakoBulawayo, uMnu Donald Khumalo uthi lonyaka kumnyama ebusweni benkawu.
UMnu Josphat Mangena uthi ikhisimusi yalonyaka inzima abantu abalamali.
UNkosikazi Phumuzile Ndlovu ubecabanga ukuthi lonyaka kuzaba ngcono kulanyakenye.
Inengi lezizalwane zeZimbabwe ezisebenzela eSouth Africa ezivame ukuba sezifikile ezigabeni zeMaNdebeleni ngalesi sikhathi somnyaka azikafiki ngitsho lezimota ezivame ukuba sezibonakala ndawana yonke yalezi zigaba azikho lonyaka uma kuqathaniswa leminyaka edlule.
USikhwicamfundo Solwayo Ngwenya ukhuthaza uzulu ukuba ananzelele azivikele ekubambeni lolubhubhane njalo abantu balandele iziqondiso zikahulumende zokuemlana leCovid-19.
EZimbabwe kulabantu abahlolwa bafumanwa beleCovid 19, abaphose bafike inkulungwane ezingamakhulu amabili-177 690, kwasila abedlula ikhulu -130,279, kwabhubha inkulungwane phose ezinhlanu-4,745, lokhu lolubhubhane lwaqhamukayo nyakenye. Okwamanje kugula abedlula inkulungwane ezingamatshumi amane lambili 42,666. Kuthi kwabahlolwe bafunyanwa belegcikwane leli ekutshoneni kwelanga layizolo babe zinkulungwane ezedlula ezinhlanu lengxenye-5,678
Emizameni yokumelana lokumemetheka kwaleligcikwane uhulumende senelise ukuhlaba abantu abaphose bafike izigidi ezintathu- 2-998 638 ngokugcweleyo kuthi abangakaqedisisi ukuhlaba sebephose bafike kuzigidi ezine-3,980,917.