amalinks wokungena

Breaking News

Abazali Lababalisi Bakhala Ngokumemetheka Kwegciwane leCOVID-19 Ezikolo eZimbabwe


FILE: Abantwana bayafunda esikolo kwele Zimbabwe. AFP PHOTO / Desmond Kwande / AFP PHOTO / DESMOND KWANDE

Abazali lababalisi bathi ukumemetheka kwegciwane leCOVID-19 ezikolo kudalwa yikuyekethisa kokulandela izixwayiso zabezempilakahle kanye lokwehluleka ukuhlola ababalisi labantwana besikolo ngesikhathi izikolo zivulwa. Lokhu sekudale ukuba abazali bengahlaliseki ngempilakahle yabantwababo ezikolo.

Kuphetha usuku lwayizolo, ugatsha lwezempilakahle lukhiphe umbiko othi balitshumi lambili - 22 ababanjwe belomkhuhlane weCOVID-19 ezikolo. Kulabantu abedlula amatshumi ayisithupha – 66 abahlolwe elizweni lonke batholakala belegciwane leCOVID-19.

UMnu. Thembakuye Moyo, isikhulumeli senhlanganiso eyeAmalgamated Rural Teachers Union of Zimbabwe, uthi ukwanda kwenani labantu abathapha igciwane leCOVID-19 besezikolo kubangwa yikuthi akuhlolwanga ababalisi lezifundi ngesikhathi kuvulwa izikolo.

"Okusuka kusidanise yikuthi inani leCovid liyaqansa ezikolweni ikakhulu ama High School. Esikunanzelela thina njenge ARTUZ yikuthi akukho okwenziwe nguhulumende njengokusithembisa kwakhe ukuba uzenza konke okusemandleni akhe ukuthi abafundi lababalisi bavikeleke kuCovid. Ingane lezi zihlala ema hostel,zifunda emaklasini zingamanani amakhulu lokhu kwenza ukuthelelana kube lula. Okunye njalo yikuba akuzangwe kuhlolwe ingane loba ababalisi ngesikhathi kuvulwa.

UNkosikazi Sukoluhle Ndlovu, ongumbalisi koBulawayo, ukhuthaza uhulumende ukuba akhuphule indlela zokumisa ukumemetheka komkhuhlane weCOVID-19 ezikolo.

"Into engingayitsho esayehlulekayo ukuthi sivikele lowu umkhuhlane yikuthi ukuvulwa kwezikolo akuzange kulungiselelwe ngendlela eqondileyo. Kwaba yisivumbu vumbu, abantu bebuya besuka endaweni ezehlukeneyo bazohlangana endaweni eyodwa so ngokuba njalo sekunzima. Aluba ehulumende uyafaka ukuthi kuhlolwe ababalisi kanye labantwana, njalo emaklasini indaba le yeSocial distance ayivumi ezikolo ngoba vele lababalisi balutshwane.

UMnu. Ambrose Sibindi, umgcinisihlalo weBulawayo Progressive Residents Association, uthi izakhamuzi zakoBulawayo kumele zilandele okwethulwa ngabezempilakahle.

"Siyananzela ukuziphatha kwabantu esigabeni akukuhle ngoba abantu ngathi sebe relaxed. Ama mask awasagqokwa, abanye sebephonguminyana. So ke sithi abantu kabananzelele ukuthi umkhuhlane usakhona, kabaqhubeke behlonipha izixwayiso zonke zeCovid. Siyananzelela ukuthi amanani abantu ukuthi ba Vaccinator sephansi, engxenye nxa uhulumende engasebenza ndawonye amanye ama Organisations ekuxwayiseni abantu ukuyahlaba ukuze umkhuhlane ume ukumemetheka.

UNkosikazi Sizakele Tshabalala, ohlana Esigodini njalo ongumzali olabantwana abafunda ezikolo ezitshiyeneyo, uthi sebedlela evalweni ngenxa yokwenzakala ezikolo.

“Silokudana okukhulu ukuthi abantwana inani labo liyakhwa,eqinisweni yebo soy amangala kodwa umtwana ngumtwana.Abantwana isocial distancing izima kibo iziqondiso ziyakhulunywa but angiboni zilandelwa ngoba abantwana banengi kakhulu esikolo langendlela abadlala ngayo kunzima ukulandela siyafisa ukuthi ngabe abantwana bayalandela iziqondiso njalo bazi ubungozi beCOVID-19.”

Kusenjalo, kulabanye abantu abalokhu bengakahlatshwa ijekiseni yokuzivikela kumkhuhlane weCOVID-19. Omunye wabo nguMnu. Norman Thebe, ohlali koBulawayo.

"Thina abanengi asikahlabi ngoba asikaboni umahluko, khangela khathesi asihlabanga kodwa amanani abantu ababanjwa belomkhuhlane lokhe esehla. Lokhu kutshengisa ukuthi i Vaccine leyi ayisebenzi mbona so right vele singahlabanga. Khathesi sekutshisa so sibona umkhuhlane lo usehla, njalo iSouth Africa size yavula i economy yabo kungenxa yokuthi amanani ayehla so ngibona engani ukuhlaba ngeke kusiphathise kangako."

UDokotela Agnes Mahomva, osebenza ewofisini kaMongameli Emmerson Mnangagwa lapho abona khona ngemikhuhlane ememetheka ngamandla, uthi bafisa ukuhlaba abantu abanengi njalo bazahlolisisa uhlelo lokuhlaba uzulu ijekiseni yesithathu.

"Abaphenyi abakwamanye amazwe bathi ukuhlatshwa amajekiseni okubooster awesithathathu kungaphathisa kodwa okwamanje sisaqakathekisa ukuthi abantu bonke bahlatshwe amajekiseni amabili avele emele umuntu wonke awathole."

Uhlangothi lwezempilakahle lubika ukuba kulomuntu obulewe ngumkhuhlane weCOVID-19 izolo eZimbabwe. Umkhuhlane lo sowabulala abantu abedlula inkulungwane ezine legxenye 4,625 eZimbabwe selokhu waqhamuka elizweni nyakenye.

Facebook Forum

XS
SM
MD
LG