Ababalisi bakhuthaza uhulumende ukuba alandele iziqondiso zokunqabela ukumemetheka kwegciwane leCOVID-19 ezikolo.
Umsekeli kamongameli, uMnu. Constantino Chiwenga, ngoLwesihlanu wethule umbiko othi izikolo zizavulwa mhlaka 7 ngoNhlolanja. Lokhu kwethusa abazali abanengi eZimbabwe abesaba ukuba lingamemetheka igciwane leCOVID-19 ezikolo nxa kungalandelwa ngemfanelo indlela eziqondileyo zokuvimba ukumemetheka kwegciwane leli.
Ababalisi bathi kumele uhulumende alandele iziqondiso zokuvimba ukumemetheka kwegciwane leCOVID-19 ezethulwa yihlanganiso yeWorld Health Organization, ezibizwa ngokuthi yiStandard Operating Procedures ngeSilungu.
Bathi iziqondiso lezi zingalandelwa ngemfanelo, ilizwe lilakho ukuvimba ukumemetheka kwegciwane leCOVID-19 ezikolo lapho elamemetheke khona ngamandla nyakenye kulandela ukuvulwa kwazo.
Osaphethe isikhundla sikamphathintambo wezempilakahle, uProfessor Amon Murwira, uthi kunengi okwenziwa nguhulumende ngesikhathi kulungiselelwa ukuvulwa kwezikolo kusenzelwa ukuvimba ukumemetheka kwegciwane leCOVID-19.
Phansi kweziqondiso zeWHO, abantwana besikolo bakhuthazwa ukuba bengasondelelani, begqoke ama-masks njalo begeze izindla ukwenzela ukungamemethekisi igciwane leCoronavirus.
UMnu. Thembakuye Moyo, isikhulumeli senhlanganiso yeAmalgamated Rural Teachers Union of Zimbabwe, uthi kuqakathekile ukulandela iziqondiso lezi.
“Uhulumende angathi isikolo lesikolo kube lombalisi owezempilakahle kodwa abe esesiyatshisa ngolwazi oludingakalayo uma sikhangele weCOVID-19. Lokhu kuzakwenza ukuba isikolo lesikolo, senelise ukulandela ngokwendlela efunwa yiWHO, ama Standard Operating Procedures. Nxa kuthe kwaba khona akwenzayo, athumele okuyizigujana, okungama 5 litres kwabo handwash lokungama 500 mililiters. Yikho yena ayabe esithi ngamalungiselelo kodwa thina sithi uhulumende kakhuphule izinga, aqeqetshise ababalisi, okwakuqala.”
UMoyo uthi amalunga enhlanganiso yeARTUZ akhathazekile ngokungalandelwa kwezigondiso ze-WHO ezikolo.
“Uhulumende ma engakwenzi lokho, kumbeni ma kumehlula lokho, amalunga ethu awasoze ahambe ezindaweni ezinjalo ngoba izindawo ezinjalo zivame ukuvuka sekuyizo phecelezi okuthiwa ngama hot spots. Abangeke bahambe lapho uhulumende angabonanga khona ukuba ama Standard Operating Procedures ayalandelwa.”
UMnu. Victor Dube, isakhamuzi seHarare, uthi uhulumende kumele alandele okukhulunywa ngababalisi.
“Ngiyakubona kuyinto eqondileyo kakhulu njalo baphuma egcekeni ukuthi hayi, lokhu bekusiphambanisa kuzinto ezinengi ukuthi izikolo zihlale zivaliwe. Izikolo, sekuyisikhathi eside zivaliwe njalo abantwana abanengi ngingathi sebeleminyaka emithathu bengafundi. Akusafunakali ukuthi bevula izikolo ngelanga abavula ngalo, otitshala bengekho ukufundisa.”
Lokhu kusekelwa nguNkosikazi Sibongile Sibanda, ohlala koBulawayo.
“Iyakhuthazwa iGovernment ukubana ilandele ama-protocols awe COVID-19 awafakwayo yi-WHO, incedise ngama sanitisers, ama-mask, ama-thermometer lapha ezikolo.”
UNkosikazi Sindiso Mgutshini, ohlala eHarare, ulombono ofanayo.
“Kuyasithwalisa nzima thina njengabazali ukuthi abantwana sebekhulela ezindlini, abantwana sebesona, abasakhuzeki ngokutshona bedlala emgwaqweni ngokungayi esikolweni. Akusiyonto engasenza thina abazali sibekwazi ukusiza abantwana ngoba abantwana bebesizwa yisikolo lathi abazali singezelele. So, khathesi yonke into isibhekane lomzali.”
Esethula umbiko wokuthukulula iziqondiso zeCOVID-19 lockdown ngoLwesihlanu, uChiwenga uthe selehlile inani labathapha igciwane leCOVID-19 eZimbabwe.
Uhlangothi lwezempilakahle lubika ukuba umkhuhlane lo kawubulalanga muntu izolo eZimbabwe. Luthi abantu abafika phose ikhulu – 82 bahlolwe batholakala belegciwane leCOVID-19 elizweni. Umkhuhlane lo sowabulala abafika phose inkulungwane ezinhlanu lengxenye - 5,333 kusukela ngoMbimbitho nyakenye.