amalinks wokungena

Breaking News

Bathithibele Esikolo seSacred Heart Okuqhamuke Umkhuhlane weCOVID-19


FILE: Abantwana besikolo bathi bayesaba ukuthelelana umkhuhlane weCOVID-19.

Kulabantu abedlula amakhulu amabili lamatshumi amathathu lanye – 231 asebehlolwe eSacred Heart High School esabelweni seMatabeleland South batholakala bele COVID-19. Lokhu kwenzakala ngesikhathi odokotela besithi kumele abantu baqaphele umkhuhlane weCOVID-19.

UDokotela Andrew Phillip Muza, okuhlangothi olubona ngemikhuhlane ethelelwanayo esabelweni seMatabeleland South, uthi bavalelwe abantwana besikolo labanye abatholakale bele COVID-19 esikolo lesi Esigodini.

Utshele intathelizindaba ukuba lokhu bedingisisa ngokuqhamuka komkhuhlane lo njalo sebehlola wonke umuntu esikolo lesi. Uthi labo abatholakale bele COVID-19 bahlaliswe bodwa njalo bahlolwa sonke isikhathi.

UDokotela Muza uthi sokudingisiswa njalo abanye abantu abahlangane lalaba okucatshangelwa ukuba bengaba lomkhuhlane lo, ukwenzela ukulonda ukuqhamuka kwawo. Uphinde wathi bazahlolisisa izikolo zonke esabelweni lesi ukuze bavimbe ukumemetheka komkhuhlane weCOVID-19.

USikhwicamfundo Solwayo Ngwenya, osebenza eMpilo Hospital, uthi kumele abantu baqaphele umkhuhlane lo.

Konke lokhu kwenzakala ngesikhathi kulabantu abafika phose inkulungwane ezingamakhulu amabili – 193,936 asebehlatshwe okwakuqala amajekiseni okuvuselela amasotsha omzimba awokulwisana ligciwane leCOVID-19. Sokulabafika phose inkulungwane ezingamatshumi amathathu 28,797 asebehlatshwe amajekiseni okwesibili. UMnu. Effort Dlela Ncube, olwela amalungelo kazulu, uthi uhlelo lokuhlatshwa abantu amajekiseni kalukaqhutshwa ngokupheleleyo. UNcube uthi kufanele kuthengwe amajekiseni amanengi.

Abanye abantu abathi bathwele nzima ngomkhuhlane weCOVID-19. Osakhulayo uDalubuhle Mpofu uthi kawutholakali umsebenzi.

“Khathesi sidinga imisebenzi lapha abaqhatsha khona bathi kumele iboard lihlale ukwenzela ukuthi ba Interview abantu kodwa imithetho ayivumi ukuthi kuhlangane abantu abanengi. Ezikolo akufundwa kufundwa nge online elukhuni ebantwini abanengi ngoba bengelisi ukuthi bathenge amadata ukuthi axhumane labanye kunzima lokhu okusehleleyo.”

UMnu. Melusi Ncube, ohlala emaphandleni, uthi ukwethekelelana sekuyinganekwane kulenzinsuku.

“Since kuqale iCOVID leyi indlela yempilo itshintshile kithi ngoba ifreedom ebesilayo asiselayo khathesi now ukuphuma iyard kumele ugqoke imask. Amavisitors are limited awusamukeli izivakatshi ezeneleyo sokumele kube le social distance lanxa uxoxa sihlale one ndawo. Indlela esesiyiphila lebesiyiphila akusafani totally ngezinye indlela asisela ndlela enhle yokuphila.”

UNkosikazi Patricia Tshabalala, olilunga leBulawayo Progressive Residents Association, uthi bayesaba ukuthi abantwana bazathapha igciwane leCOVID-19 ezikolo.

“Siyesaba besifisa ukuthi uhulumende ngabe uyathatha inyathelo elikhulu abafundise abantu nge injection.”

UNkosikazi Selina Ndlovu, ohlala eTshabalala, uthi imfundo yabantwana isibuyela emuva ngenxa yeCOVID-19.

“Singabazali esikubonayo ngeCOVID leyi kunzima kuyasinzimela njengabazali kusilimazile, abantwana abafundanga umnyaka wonke khathesi izikolo sezivuliwe abantwana bafunda amaqhamuqhamu ngeviki ahambe ka one omunye ahambe ka2 kulobunzima obukhulu. Ngabe uhulumende uyakubona noma kuyiCovid ilanga elilodwa bafundeni abantwana sicina singasakwazi ukuthi bavuleleni nxa befunda ilanga elilodwa.”

Kulabantu abafika phose inkulungwane ezingamatshumi amane – 37,273 asebehlolwe batholakala beleCOVID-19 kwaphepha abedlula kancane inkulungwane ezingamatshumi amane. ICOVID-19 isibulele abedlula inkulungwane lengxenye – 1,538 eZimbabwe kusukela ngoMbimbitho nyakenye.

Facebook Forum

XS
SM
MD
LG