amalinks wokungena

Breaking News

Uhulumende Uthi Abantu Abanengi Kabasalandeli Iziqondiso Zokuvimba Ukumemetheka Komkhuhlane weCOVID-19


Uhulumende wakwele Zimbabwe uthi ukhathazwa ngokwenziwa ngabantu abangasalandeli ngemfanelo iziqondiso zokuvimba ukumemetheka komkhuhlane weCOVID-19 osubulele abedlula amakhulu amathathu elizweni – 307.

UDokotela Agnes Mahomva, okhokhela uhlangothi lukahulumende olulwisana lokumemetheka kwegciwane leCOVID-19 olweNational Response to COVID-19 Pandemic in Zimbabwe, usanda kwethula umbiko oveza ukuba uhulumende ukhathazekile ngokwenziwa ngabantu abangasalandeli iziqondiso zokuvimba umkhuhlane lo ezethulwa yinhlanganiso yamazwe omhlaba wonke jikelele eyeWorld Health Organization.

“Kabasazihluphi ukugqoka ama face mask abantu. Ngithanda ukukhumbuza uzulu ukuthi kumele akwenze lokho ngales’isikhathi ilizwe lingakabi lawo lowo muthi onikezwa abantu wokuzivikela kiwo. Indlela kuphela yokuzilondoloza kulomkhuhlane yikulandela lezo ziqondiso ezabekwayo ngokufaneleyo ngoba ziyasebenza. Kumele umuntu wonke agqoke iface mask yakhe, angaze athintana labanye mahlayana isocial distancing njalo adlalele khatshana lalapho okubuthana khona abantu lokuthi ageze izandla nsuku zonke ngesepa kumbe isanitiser.”

Wethule umbiko lo ngesikhathi sokulabantu abedlula inkulungwane ezilitshumi lanye – 11,162 asebehlolwe kusukela ngoMbimbitho lonyaka batholakala bele COVID-19 eZimbabwe. Uhlangothi lwezempilakahle luthi abedlula inkulungwane eziyisificamunwemunye – 9,324 sebaphepha kumkhuhlane lo. Kulabantu abangamatshumi ayisificaminwemibili lanye – 81 abahlolwe izolo batholakala bele COVID-19. Phakathi kwenani leli, abantu abanengi abatholakale belomkhuhlane lo ngabahlala koBulawayo. UDokotela Solwayo Ngwenya, osebenza eMpilo Hospital, uthi abantu abanengi kabasazilandeli iziqondiso zokuvimba ukumemetheka komkhuhlane weCOVID-19.

“ICoronavirus le ayizihambeli yodwa, umuntu nguye oyihambisa komunye umuntu. Ephefumulela omunye umuntu, umuntu ayithathe, kumbe ingene emehlweni kumbe ingene emlonyeni.”

Kulabantu abathi akuncedi okukhulunywa nguhulumende ngoba abantu abenelisi ukuziphilisa kahle bedinga lokokuzivikela kumkhuhlane weCOVID-19. UNkosikazi Melissa Chingwangwana, okuhlanganiso yeAmalgamated Rural Teachers Union, uthi kunzima kakhulu ukuzivikela kumkhuhlane lo.

UMnu. Collins Ncube, ohlala eHarare, uthi ukuswelakala kwamabhasi okuthwala abantu emadolobheni kumemethekisa kakhulu iCOVID-19.

Emhlabeni wonke jikelele, isibhedlela seJohns Hopkins University sibika ukuthi abantu abafika phose izigidi ezingamatshumi ayisikhombisa – 70 million sebehlolwe batholakala bele COVID-19 kwathi abedlula izigidi lengxenye – 1.6 million babhubha.

Kwele Melika sokulabantu abedlula izigidi ezilitshumi lanhlanu – 16 million asebetholakale bele COVID-19 kwabhubha abafika phose inkulungwane ezingamakhulu amathathu – 297,000.

Okwamanje, ilizwe leBhilithane seliqalile ukusebenzisa ijekiseni yokuvimba ukumemetheka kweCOVID-19 kuthi kwele Melika sebeqalile ukuthumeza ezabelweni ezitshiyeneyo umuthi olungiswe yinkampani yePfizer. Kukhangelelwe ukuba ilizwe leli lizaqala ukusebenzisa ijekiseni le kumahola ambalwa alandelayo.

'Abantu Abasagqoki AmaMasks'
please wait

No media source currently available

0:00 0:04:21 0:00


Facebook Forum

XS
SM
MD
LG