amalinks wokungena

Breaking News

Sokulungiselelwa Ihlandla Lesibili Lohlelo Lokuhlaba Abantu Ijekiseni Yokuzivikela Kumkhuhlane weCOVID-19


FILE: Osebenza eWilkins Hospital ulungisa ijekiseni yeSinopharm, March 11, 2021. (Columbus Mavhunga/VOA)

Luqala kusasa uhlelo lokuhlaba okwesibili abongi, odokotela labanye abemukela ijekiseni yeSinopharm kusungulwa uhlelo lolu ngoNhlolanja lonyaka.

Uhlangothi lwezempilakahle luthi bedlula inkulungwane ezingamatshumi amane – 42,210 asebehlatshwe kuhlandla lakuqala ijekiseni yeSinopharm eZimbabwe eyokuzivikela kumkhuhlane weCOVID-19. Kukhangelelwe ukuba ihlandla lesibili lizaqala kusasa elizweni lonke jikelele.

Umsekeli kamongameli, uMnu. Constantino Chiwenga, sewahlatshwa okwesibili esenzela ukukhuthaza abantu kuba bahlatshwe ijekiseni le eyanikwa eleZimbabwe ngele China.

UNkosikazi Juliet Khumalo, umongi osebenza esibhedlela seUnited Bulawayo Hospitals, uthi sekhangelele ukuhlatshwa ijekiseni yesibili.

“Mina ngikhangelele ukuthola i-second dose yeCOVID-19 vaccine ngoLwesine lolu. Engingakutsho yikuthi ngize ngihlatshwe kuqala angizange ngike ngibe lama side effects ngaphandle kokuzwa ubuhlungu kungalo engahlatshwa kiyo, ngalokhu ngibona i-vaccine leyi i-safe kasikhuthazeke siyihlabe sonke ukuze sivikeleke kubhubhane lolu.”

Umongi, uMnu. Wellington Tshabangu, uthi laye uselindele ukuhlatshwa okwesibili.

“Silindele ukuthi sihlatshwe okwesibili loba nje ezinye ingcitshi zithi singaba lezinyalo nxa sesihlatshwa ijekiseni yesibili. Kodwa siyananzelela ukuthi abanye ngani bayahlelela emuva ukuthi bahlatshwe mhlawumbe balindele ukuthi babone ukuthi laba asebehlaba eyesibili bazaba njani.Kodwa singakhangela vele ngokwempilakahle izinyalo zikhangelelekile vele kuyo yonke imithi esithathayo, ngakho akumangalisi ukuthi abantu babe lezinyalo nxa bengahlaba lijekiseni ye Corona Virus eyesibili.”

UNkululeko Mathe, osakhulayo ofunda eNational Universtiy of Science and Technology, uthi usezimisele ukuhlatshwa ijekiseni yeSinopharm njengoba kungela muntu okuthiwa ulaliswe esibhedlela kulandela ukujovwa ijekiseni le.

“Indaba ye vaccine, ukuyithatha i-vaccine le mina ngibona ku right ngoba sabona ama ministers lo Vice President beyithatha so asikaboni i-problem kibo. Lathi ngobona kukuhle ukuthi sithathe i-vaccine ukuze sihlale sivikelekile.”

UMnu. Ambrose Sibindi, isakhamuzi sakoBulawayo, uthi akumelanga abantu babanjwe ngamandla ukuthi bahlatshwe ijekiseni yeSinopharm.

“Siyananzelele ukuthi umkhuhlane weCOVID-19 mutsha, imizamo yonke ikhona ukuthi umkhuhlane lowu unqandwe ungamemetheki. Siyakwazi ukuthi kulenkulumo ezinengi mayelana le vaccine ukuthi ayiqedakali abanye bathi iyaqedakala. Kodwa esikutshoyo yikuthi njengezakhamuzi zakoBulawayo abantu abakhululekileyo kabahambe bayehlaba ukwenzela ukuthi bavikeleke. Kodwa longakhululekanga angazihlalela ngoba kungabanjwa ngamandla, asiyekeleni abahambayo bahambe abayesabayo labo besale sikuhloniphe kunjalo.”

Umqondisi wogatsha lwezempilakahle kukhansili yakoBulawayo, uDokotela Edwin Sibanda, uthi inhlelo zokuqhutshwa kohlelo lokuhlatshwa kwabantu iSinopharm kusiya phambili zizakwethulwa kusasa. Okwakhatshesi bekulendawo ezine koBulawayo ezokuhlaba kwalabo abavunyelweyo kuhlelo lokuqala. Indawo lezi yisibhedlela seMpilo, iMaqhawe Clinic, Emakhandeni Clinic lePrincess Margaret.

Udaba Esilethulelwe NguBathabile Masuku
please wait

No media source currently available

0:00 0:03:34 0:00


Facebook Forum

XS
SM
MD
LG