Sekuleviki abantu abahlala eKwekwe bevalelwe ezindlini kuhlelo lwe-lockdown kusenzelwa ukuvimba ukumemetheka komkhakha omemetheka ngamandla owegciwane leCOVID-19, osanda kubulala umuntu edolobheni leli.
Abantu abanengi eKwekwe bathi kunzima ukulandela iziqondiso zohlelo lolu kulandela ukubhubha komuntu obelomkhakha wegciwane leCOVID-19 obulala abantu abanengi kwele India.
UMnu. Alex Thomas Homela uthi abantu kabenelisi ukuhlala ezindlini ngenxa yokuthi bayazisebenzela emikambo lezinye indawo.
Lokhu kusekelwa nguMnu. Jabulisa Tshuma, esinye isakhamuzi seKwekwe.
UTshuma ufisa ukuthi uhulumende angenele ukwenzela ukunceda ababhekane lenhlupho ezitshiyeneyo edolobheni leli.
UTshuma uthi umkhakha wegciwane leCOVID-19 wenze abantu abanengi ukuthi bayehlatshwa ijekiseni yokuzivikela kumkhuhlane weCoronavirus.
Iziphathamandla zekhansili yeKwekwe zalile ukukhuluma ngodaba lolu. Kasenelisanga lokukhuluma leziphathamandla zikahulumende ngoba bezingaphenduli omakhalekhukhwini babo. Uhulumende uthi bayakulandela konke okwenzakala eKwekwe.
Kusenjalo, sekusilela amajekiseni okuhlaba abantu elizweni lonke jikelele ukwenzela ukuba bazivikela kukhuhlane weCOVID-19.
Okwamanje uhlangothi lwezempilakahle luthi kulabantu abedlula inkulungwane ezingamakhulu ayisithupha - 666,786 asebehlatshwe okwakuqala ijekiseni yokuzivikela kumkhuhlane weCOVID-19 eZimbabwe kuthi abedlula inkulungwane ezingamakhulu amathathu – 335,679 sebehlatshwe okwesibili.
Uhulumende ufisa ukuba kuhlatshwe abayizigidi ezilitshumi – 10 million. ICOVID-19 seyabulala abantu abedlula inkulungwane lengxenye eZimbabwe – 1,594 kusukela ngoMbimbitho nyakenye.
