amalinks wokungena

Breaking News

Umemetheka Ngamandla Umkhuhlane weCOVID-19 eZimbabwe


USpiwe Tembo, uthengisa impahla emigwaqweni eZimbabwe ngesikhathi kumemetheka igciwane leCOVID-19

Uhlelo lokuhlaba abantu ijekiseni yokuzivikela kubhubhane lweCOVID-19 luqhubekela phambili ngesikhathi limemetheka ngamandla igciwane leCoronavirus eZimbabwe.

Abantu abedlula amatshumi amane - 42 babulewe ngumkhuhlane weCOVID-19 eZimbabwe izolo kwathi abedlula amakhulu amahlanu – 559 bahlolwe batholakala belegciwane leCoronavirus.

Umkhuhlane lo sowabulala abantu abedlula inkulungwane ezimbili 2,126 phakathi kwabedlula inkulungwane ezingamatshumi amane – 44,580 asebehlolwe kusukela ngoMbimbitho nyakenye batholakala bele COVID-19.

Lokhu kwenzakala ngesikhathi uhulumende eqhuba uhlelo lokuhlaba abantu ijekiseni yokuzivikela kumkhuhlane lo. Abantu bakhuthazwa ukuba bahambe endaweni ezitshiyeneyo beyehlatshwa ijekiseni yokuzivikela kumkhuhlane weCOVID-19.

Umphathintambo wesabelo seBulawayo Metropolitan, uNkosikazi Judith Ncube, uthi wonke umuntu kumele ayehlatshwa kungakhethelekile ukuthi uyini.

"Kusukela ngoMvulo wonalu esiwulandayo wonke amakiliniki kamanisiplala lezinye endawo ezazivuliwe ziqalisa zizabe zivuliwe kuzabe kuvaccinate bonke abantu, kuyabe kusekho ukuthi ngamavendors wodwa. Asibakhuthazeni abantu bengene emaclinic aduze labo ukuze singaminyani ndawonye njengoba ilizwe lamukele amajekiseni ayi2million kutsho ukuthi sizazuza inani elithe xaxa njengoBulawayo kungakho siyakhuthaza ukuthi abantu bezihambele abafisa ukuthi beyehlatshwa.”

UMnu. Greater Sibanda, isakhamuzi seMganwini koBulawayo, uthi abantu abalaleli okwethulwa nguhulumende loba sebehamba ngobunengi babo ukuyahlatshwa ijekiseni.

"lsimo sibi kakhulu lapha koBulawayo ikakhulukazi ngezeCovid 19 ngoba izibalo kukhanya ziyaqansa izikhathi zonke ngoba sizwa njalo kuthiwa abantu bayafa, khathesi sekuze kusifa lalaba esibaziyo.Abantu bakithi into engiyibonayo ngeyokuthi abalaleli inkuthazo lezi ezikhuthazwayo izikhathi zonke okutikuthi abantu ngabe bayalindela le into.Ngibona khathesi kuyonale iviki abantu bebesukuma ngobunengi, abantu sebeqala ukuthi bakuzwisise ukuthi sikhona isidingo sokuthi bayehlaba amajekiseni kuyinto ebukekayo kakhulu leyo.”

UNkosikazi Sikhanyiso Lunga, isakhamuzi seNkulumane, uthi bekunzima ukuthi bahlatshwe kuviki edlulileyo ngoba kulencwadi ebezifunakala.

“Sehlulekile ukuthi sihlabe ivaccine okokuqala yikuthi besivuka ekuseni sihambe siyebamba iline abahlabayo nxa bebuya bethi bafuna abantu abalamalisence evending kusuka kusihluphe ngoba lathi singamavendors kodwa asilawo amalisence. Ivaccine lathi siyayifuna ukuthi siyihlabe lathi sikhangelele ukuthi kuleyi iviki bengasiconsider lathi esingela malisence. Kusuke kube yisibhubhu kakhulu akusela spacing abantu akusela i1meter apart, kwesinye isikhathi sisuka sesabe ukuthi uyacina usuka usuthethe iCovid, akula muntu okhangela iline ukuthi yi 1 Meter kümbe anike abantu amanumber.”

lsakhamuzi seMakhandeni, uMnu. Thabani Ndlovu, uthi kumele uhulumende ajezise abantu abangalandeli iziqondiso zokuvimba ukumemetheka kwegciwane leCOVID-19 eZimbabwe.

"Ngibona angathi kumele kungezelelwe umthetho ukwenzela ukuthi abantu balalele lanxa sesifika endaweni yamask maybe amafine engezelelwe ukwenzela ukuthi abantu bebone ukuthi into le iqakatheke okunganani ngoba sesiphelile ngoba emalokitshini lapha ungezwa kuthwa umuntu ucollapse wafa uhle ubekwazi ukuthi yiCovid akusamanga kuhle.”

UDokotela Mthabisi Bhebhe, osebenza koBulawayo, uthi abantu kabahlatshwe ijekiseni njalo bezifundise ukutshiyelana izikhala nxa bephakathi kwabanye.

"Umuntu wonke kavaccinate kuzasincedisa ekunqobeni umkhuhlane lowu weCovid-19 osuqede abantu bonke awulani lokuthi sikuWinter kuyatshisa okuqakathekileyo yikuthi abantu kumele bapractise isocial or physical distancing begqoke ama mask bengahlali endaweni eziminyeneyo.Umuntu kumele atshiye idistance ye 1 meter njalo nxa ekhwehlela akhwehlelele ku elbow.”

Abantu ababanjwe belomkhuhlane weCOVID-19 izolo balikhulu elilodwa elilamatshumi ayisithupha - 160 koBulawayo kuthi inani labantu abalomkhuhlane lo uBulawayo wonke bangaphezu kwenkulungwane eziyisitshiya ngalombili – 8,124. Kuthi ababhubhileyo bane.

lnani labantu ababanjwe belomkhuhlane lo baphuma ezigabeni ezinthathu koBulawayo ezigoqela iNkulumane elabantu abangamatshumi amabili lesithupha - 26, kuthi Emakhandeni bangamatshumi amathathu lasitshiya galombili - 38 lama Northern Suburbs kulabantu abaphose bafike ikhulu -96.

Sokulabantu abafika phose isigidi – 886,619 asebehlatshwe ijekiseni yakuqala kuthi abafika phose inkulungwane ezingamakhulu ayisithupha - 590,501sebehlatshwe eyesibili.

Udaba Esilethulelwe NguBathabile Masuku
please wait

No media source currently available

0:00 0:03:53 0:00


Facebook Forum

XS
SM
MD
LG