Umqeqetshi wekolitshi leJoshua Mqabuko Nkomo Polytechnic sebulewe ligciwane leCoronavirus kuthi omunye njalo ulaliswe esibhedlela seGwanda, lokhu sekudale ukuqonga kwenani lalabo asebebulewe yilumkhuhlane laya kwabalitshumi eZansi yemaNdebeleni.
UMngcinisihlalo wekomidi elwisana lokumemetheka kwegciwane leCoronavirus ekolitshini leJoshua Mqabuko Polytechnic, uMnu Tichakunda Hove, ubike ukuthi uNkosikazi Vonai Chigiya obhubhe ngoMvulo kuliviki kutholakale ukuthi uthethwe ligciwane leCoronavirus ngemva kokuhlolisiswa kwembangela yokufa kwakhe.
Encwadeni ayibhalele abaqeqetshi labafundi balelikolitshi , uHove uveze ukuthi omunye njalo wabaqeqetshi kulelikolitshi uNkosikazi Flora Zhou ulaliswe esibhedlela esikhulu seGwanda ngemva kokutholakala elegciwane leCoronavirus.
Kungakho uthi abasondelelana lababili laba kuzamele babhalise amabizo abo ekolitshini.
Sixoxe lomunye wabafundi ongathandanga ukuqanjwa ngebizo lakhe othi basengozini ngaleligciwane.
“Njengabafundi sisengozini yokuba siCovid 19 positive silovalo njalo ukuthi sesingama ukufunda ngoZibandlela, okwamanje abanye bekumele bayekuteaching practice kodwa abesenelisanga ngendaba zeCovid ebambelele izinto ezinengi kungakho sesisebunzimeni sikhangelane lamafess besizitshela ukuthi ngomnyaka ozayo sizakuya kuteaching practice kodwa sekumele sibuyele esiolo siyebhadala.”
UMnu. Nkanyiso Ncube, isakhamuzi seGwanda, wethesa uzulu umlandu wokungalandeli iziqondiso zokuvikela lumkhuhlane osekudale ukuqonga kwenani labantu abahlaselwe yilumkhuhlane kulesisabelo.
“Into ekhona yikuthi sänke nya singabantu asiyenzeni khonokhuyana okwakhulunywa yiWorld Health Organsiation sihlale silamamask endaweni eziminyeneyo njalo sizama yonalawo amasocila distancing layonaleyo ipopulation migration yiyo inkinga njalo ngibonile lapha ukuthi simutatile njalo imutation yakhho ise Eastern Cape so abantu abasuka khonale emaxhoseni mayibabo.”
Sebedlula inkulungwane eyodwa-1,320, abahlaselwe yiCoronavirus esabelweni seMatabeleland South, kulabagulayo okwamanje abedlula amakhulu amathathu - 351.