amalinks wokungena

Breaking News

Bayaxotshwa Abantu Endaweni Ezokuhlaba Uzulu Ijekiseni Yokuzivikela Kumkhuhlane weCOVID-19


Ukuhlatshwa kwabantu ijekiseni elivikela ukubamba igcikwane leCovid-19 kuqhubekela phambili edolobheni lakoBulawayo lalobanje sebekhona ababhekana lodubo lokubuyiselwa emakhaya bengahlabanga ngoba inani labahlatshwa ngelanga liyabe selenele laloba umuntu eyabe evukele ngovivi.

Inengi labantu bakoBulawayo likhala ngokuthi liyavukela emtholwampilo lisiyadinga ukuhlaba ijekiseni yeCovid-19 Vaccine, kodwa abanye babo babuyiselwa emakhaya bengahlatshwanga ngoba inani labantu abayabe bezahlaba selenele.

Kulabanengi ababonakale bebuyela emakhaya lamhlanje bengahlatshwanga ekilinika yekhansili eDr Shennan Clinic.

Omunye walabo ababuyiselwe emuva, nguMnu Albert Sibanda isakhamuzi sakoBulawayo.

“Ngiseclinic yeBG lapha bathethe abantu abayi 86, besize siyizisebenzi size singu10 sizohlaba bathi inani labantu abazabahlaba selenele, lamuhla bathethe abangu 86, sesisiyazama ukuhlaba kwezinye indawo njalo bathe abamankampani bathatha abayi 6 kuphela thina besingu10.”

UMqondisi wezempilakhle esibhedlela seMpilo, uSikhwicamfundo Solwayo Ngwenya ukhuthaze uzulu ukuba aqhubeke ezivikela kuCovid-19 ngoba loba uhlabe okupheleleyo iCovid ilakho ukukuhlasela.

“Siyananzelela ukuba uhulumende usethe labo abahlabileyo okupheleleyo sebengenelisa ukuya enkonzweni.Ngilicwayisa ukuba ubhabhane lweCorona virus sekulobhubhiswana lweDelta variant abantu kumele linanzelele lapho eliyakhona, ligqoka amamask, ngoba lolubhubhiswana lweDelata variant luyingozi njalo labo asebehlatshiwe lungabahlasela njalo ngakho lapho lisiyaezinkonzweni kumele linanzelele.”

Umqondisi wezempilakahle esigabeni sakoBulawayo, uProvincial Medical Director, uDokotela Welcome Mlilo uthi uhlelo lokuhlaba abantu luqhubeka kakuhle esabelweni sakhe.

“Uhlelo lwethu lwevaccination against Covid-19 luyaqhubeka kuhle esigodlweni sakoBulawayo ivaccine yecovid-19 iyatholakala kuwowonke amakilinika, izibhedlela ezinkulu, ezinjenge UBH, Mpilo leNgutsheni. lyatholakala njalo kumaprivate sector lapho okubhadalwa khona intengwanyana yokuthi uyithole leyo vaccine. Silayo ivaccine ngobunengi last week ibulawayo ithole amanye njalo amajekiseni ayi50 000. Siyakhuthazana ukuba abantu baye ezindaweni engiziqambileyo bathole ivaccine.”

Lisiyatshona ilanga layizolo ugatsha lukahulumende lwezempilakahle lukhuphe umbiko othi abantu abangamatshumi amane lanye-41 babulewe yiCovid-19, kuthi abaphose bafike amakhulu ayisikhombisa-696 bahlolwe bafunyanwa belegcikwane leli

KoBulawayo sekulabantu abaphose bafike inkulungwane ezingamakhulu amabili(178,641) abahlabe ijekiseni lakuqala leCovid-19 kuthi asebehlabe elesibili sebesedlula inkulungwane ezilikhulu-107,015.

Ezweni jikelele asebehlabe ijekiseni lakuqala sebephose bafike izigidi ezimbili -1,933,220 kuthi asebehlabe okwesibili sebesedlula isigidi esisodwa -1,084,392 njalo uhulumende weZimbabwe ukhangelele ukuhlaba abantu abayizigidi ezilitshumi, kumbe isilinganiso sabangamatshumi ayisithupha ekhulwini sikazulu wonke elizweni.

Facebook Forum

XS
SM
MD
LG