Iqembu leZimbabwe Chevrons linqotshwe ngama runs alikhulu lamatshumi amahlanu lanhlanu ngele Bangladesh emdlalweni wakuqala owohlobo lwe One Day International oqhutshelwe esigodlweni iHarare ngoLwesihlanu.
Iqembu leBangladesh yilo eliqale ukutshaya ibhola labuthelela ama runs angu276 lilahlekelwe ngabadlali abayithoba munwe munye kuma overs alo angamatshumi amahlanu.
Lokhu kutsho ukuba eleZimbabwe bekumele libuthelele ama runs angu277 ukuze linqobe kodwa liphange lalahlekelwa ngabadlali ngesikhathi sekulithuba lalo elokuba litshaye ibhola.
Ekhuluma ekupheleni komdlalo ukaputeni weqembu leZimbabwe uBrendan Taylor ukhale ngokwehluleka kwabo ukucobodisa iqembu leBangladesh ngesikhathi belikhulela.
“Umehluko phakathi kwamaqembu womabili yikuthi bona bengazithola besebunzimeni ubunzima bakhona bayabumela. Thina ngakwelethu icele besihlele ukuba siqale kuhle sihle sikhuphe abadlali babo abaqala ukutshaya ibhola kodwa sithe sesikwenelisile lokho sehluleka ukuthi sihle sibancitshe umoya,” kutsho uTaylor.
Umdlali weqembu leBangladesh uLiton Das nguye okhethwe ukuba ngumdlali odlale okwedlula abanye namhla ngemva kokuthola ama runs alikhulu lambili njalo ukaputeni wakhe uTamim Iqbal umtshayele ihlombe ngokubahlenga engozini.
“Iqembu le Zimbabwe lijike kuhle ibhola kuma overs awakuqala alitshumi lanhlanu njalo sithwale nzima salahlekelwa ngabadlali abambalwa.
Sincedwe nguLiton, uMahmudullah kanye loAfif njalo lokhu kuyangithokozisa ngoba yinto esihlala siyikhuthaza ukuba nxa abaqala ukutshaya ibhola bengadlalanga kuhle kumele abanye besihlenge engozini,” kutsho uIqbal.
Umdlali weqembu leZimbabwe uRegis Chakabva nguye odlale ngcono ekutshayeni ibhola njengoba ethole ama runs angamatshumi amahlanu lane kuthi ukaputeni uBrendan Taylor yena uthole angamatshumi amathathu lanye.
Omunye umdlali obekumele atshaye ibhola uTimycen Maruma akasadlalanga ngoba esuke walimala.
Umdlalo wesibili owohlobo lweOne Day International phakathi kweqembu leZimbabwe lele Bangladesh uzadlalwa ngeSonto mhla zilitshumi lathoba minwe mbili kusithi owesithathu njalo ungowokucina owaloluhlobo uzadlalwa ngoLwesibili mhla zingamatshumi amabili.
Iqembu leZimbabwe lilabadlali abathenjiweyo abangadlalanga namhla ababalisa uSean Williams, uCraig Ervine kanye loSikandar Raza. URaza ubengezwa kuhle okwesikhathi eside ikanti uWilliams loErvine bona babikwa bebengavunyelwa ukuba ndawonye labanye abadlali ngoba beke baba ndawonye labantu ababanjwe umkhuhlane weCOVID-19.
Ngemva komncintiswano weOne Day International amaqembu lawa azadibana kumidlalo emithathu eyohlobo lweTwenty20.