amalinks wokungena

Breaking News

IZimbabwe Cricket Isungula Imncintiswano Yabesifazane


Abenhlanganiso yeZimbabwe Cricket sebesungule imncintiswano eyezigaba ezadlalwa ngamaqembu abesifazane.

Ukusungulwa kwemncintiswano yamaqe mbu abesifazane eyohlobo lwe One-Day kanye leye T20 kulandela ukubunjwa okwenziwe umncintiswano weNational Premier League wona odlalwa kulezinsuku ngamaqembu abesilisa amele izigaba ezitshiyeneyo zelizwe le Zimbabwe.

Ekhuluma lentathelizindaba ngemva komkhosi wokusungula imncintiswano le umgcinisihlalo wenhlanganiso yeZimbabwe Cricket uTawengwa Mkuhlani uthe isehlakalo sanamhlanje sitshengisa ukukhula komdlalo kakhilikithi elizweni.

“Ukwenelisa ukusungula imncintiswano emibili eyabesifazane kusipha ithuba lokukhulisa umdlalo kakhilikithi ngoba kupha ithuba amantombazane alesifiso esokudlala lumdlalo.

Sekuzakuba lula ukuba singene ezikolo sibumbe amaqembu ngoba khathesi balutshwane abesifazane abadlala lumdlalo,” kutsho uMkuhlani.

Imidlalo eyosuku lwesine kumncintiswano wamaqembu abesilisa owe National Premier League idlalwe ngokulandelayo;

Iqembu le Great Zimbabwe Patriots linqobe ele Easterns nge 37 runs. Iqembu le Great Zimbabwe Patriots libe le 105/10 kuma overs angu 33 kwathi ele Easterns seliphendula lenelise 68/10 kuma overs angu 21.

Ngokwakuqala ukuba leliqembu linqobe selokhu kusungulwe limidlalo. Lumdlalo uqhutshelwe enkundleni ye Mutare Sports Club.

Emdlalweni oqhutshelwe enkundleni ye Old Hararians iqembu le MidWest litshaye ele Harare Kings nge 5 wickets.

Iqembu le Harare Kings liqale ukutshaya ibhola lathola 167/10 kuma overs angu 40 kwathi ele Midwest seliphendula lenelise 168/5 kuma overs angu 35.3.

Ngase Kwekwe Sports Club iqembu le Queens linqobe ele Gladiators nge 7 wickets. Iqembu le Gladiators lenelise 137/10 kuma overs angu 37.3 kwathi ele Queens seliphendula lathola 138/3 kuma overs angu 26.4.

Kube lempumela efanayo lase Takashinga Sports Club lapho iqembu le Takashinga elinqobe khona ele Rainbow Sharks ngama wickets ayisikhombisa.

Iqembu le Sharks lithole 107/10 kuma overs angu 40 kwathi seliphendula ele Takashinga lithole 111/3 kuma overs angu 13.2.

Facebook Forum

XS
SM
MD
LG