Izithunywa zika Mongameli Cyril Ramaphosa ngoMvulo zixoxisane loMongameli Emmerson Mnangagwa eHarare eState House zabuyela kwele South Africa zingakhulumanga lenkokheli yamabandla aphikisayo labanye.
Lokhu kutshiya abamabandla aphikisayo lenkokheli yenhlanganiso ezizimeleyo bebambe owangaphansi besithi kuyamangalisa okwenziwe nguNkosikazi Baleka Mbete, uDokotela Sydney Mufumadi, loMnu. Ngoako Ramatlodhi.
Abathathu laba bangene eState House eHarare behamba phezu ‘kwecansi’ lonhlonzi oluphezulu - ired carpet.
UMnu. Nick Mangwana, umabhalani omkhulu wohlangothi olubona ngezokwethulwa kwemibiko eZimbabwe, ulobe ebulenjini bokuxhumana obeTwitter ukuthi abathathu laba baxoxisana loMnangagwa babuyela kwele South Africa “njengalokhu okwake kwenziwa ngumongameli owathuma uKazembe Kazembe kwele Conaktry afika akhuluma lomkhokheli welizwa wasebuyela ekhaya.”
UKazembe yisiphathamandla sikahulumende welizwe leZimbabwe obona ngezemithetho.
Okwenziwe yizithunywa zika Ramaphosa kucaphule abantu abanengi abathi sokuzalele ingwe eZimbabwe okulabantu abatshaywa kabuhlungu ngabezomvikela okuthiwa bathunywa nguMnangagwa.
Isikhulumende sebandla leMDC Alliance, uNkosazana Fadzai Mahere, uthe okwenziwe yizithunywa lezi kuveza ukuthi uMnangagwa kazimiselanga ukulungisa okuhluphayo eZimbabwe njalo lokwephulwa kwamalungelo abantu abavinjwa ngamasotsha lamapholisa ekupheleni kuka Ntulikazi befuna ukutshengisela emigwaqweni bekhonona ngobukhohlakali lokunye.
UNkosazana Mahere uthe kusobala ukuthi abathathu laba bavinjwe libandla leZanu PF ukuthi bakhulume loMnu. Nelson Chamisa labanye abalandeli bebandla leMDC Alliance.
Isikhulumeli sebandla leMDC-T, uMnu. Khaliphani Pugeni, uthe batshayelwe ucingo ngomeli ilizwe leSouth Africa kwele Zimbabwe obatshele ukuthi abathathu laba kabasoze bahlangane lenkokheli yebandla leli elikhokhelwa nguNkosazana Thokozani Khupe.