amalinks wokungena

Breaking News

Bathithibele Abantu eGwanda Okulesidumbu Esicine Sinukwa Yizinja Emavinkilini Amapholisa Edinga Imota Lebhokisi Lokusithwala


Okwenzakale eGwanda ngoLwesine okulomuntu ocatshangelwa ukuba uzibulele ngokunatha iphoyizeni. (Photo: Albert Ncube)

Izakhamizi zeGwanda zisola amapholisa aleli dolobho ngokuphuza ukuzolanda isidumbu sowelisisa okucatshangelwa ukuthi angabe ezibulele emavikilini awePhakama.

Amapholisa athethe amahola amahlanu ukufika kungenani lokuthi lumango uyimzuzu emihlanu kuphela lapho uhamba ngemota.

Amapholisa eGwanda abesalinde imota yenkamba yeGuyu ukuzothwala isidumbu, lalapho sebefikile bebengelabhokisi okudale ukuthi umufi agoqelwe ngamabhokisi langamalembu engakafakwa emoteni.

Zisele zikhuza imihlolo izakhamizi zeGwanda ngemva kokutholakala kowesilisa obefile phambi kwezitolo zePhakama, namhlanje ekuseni.

Kuthe kutshaya ihola lesikhombisa uzulu ebesebuthene kulezizitolo ukuze azozibonela ngawakhe umufi oze wathathwa ngehola letshumi ekuseni.

UMnu. Debolas Jazi, oyisakhamuzi seSenondo ,ngomunye walabo abagijime bayafika lapho besizwa ngalumonakalo.

“Kalanxeba kalani, lepoison yakhona nansiyana iyazikhanyela enyaweni zakhe

Kuyatshengisela ukuthi kazange wafakwa sandla ngumuntu okhanye ebelenkinga lemuli yakhe kumbe lonkosikazi wakhe kodwa engikhala ngayo yikuthi uhulumende kumele athathe amanyathelo entweni ezinje so kathesi izinja lokhu zibuya zimnukisa kulabantwana akulunganga lokhu asikuvumeli.”

Okugcizelelwe nguNkosikazi Ntombizodwa Dube owePhakama othi abakubone namhlanje kuyethusa.

“Sizwa ubuhlungu singabazali sazala so ukuthi umntwana ebelele khonalapha , umuntu yinhlanzi bizani amapholisa aithathele umuntu wethu lowu , umuntu yinhlanzi uyonakala kathesi wena uzwa njani kuyangethusa.”

Lalapho sebuyile amapholisa ebengela bhokisi lesidumbu okudale ukuthi badinge amakhadibhokisi lamalembu ezitolo ukuze bagoqela umzimba womufi.

UMnu. Wellington Nare, olilunga lenhlanganiso yabahlali bakulelidolobho eyeGwanda Residents Association, uthi uzulu uyazibuza ngokuziphatha kwamapholisa aleli dolobho.

“Kuyinto elihlazo kakhulu kucommunity ukwephula isiko lomkhuba wendawo yakithi, njengabahlali beGwanda sithithibele siyamangala ngokwenzakalayo ayisikho kokuqala ukuthi amapholisa aphuze endabeni ezinje ngalezi, amapholisa kumele ahlale ezilungiselele abelamabhokisi, umphakathi uyazibuza ukuthi pho bazenelisa na ukulwisana lezigilamkhuba besehluleka into ezincane ezifana lalezi.”

Isikhulumeli samapholisa eZansi yemaNdebeleni uNkosikazi Loveness Mangena kaphendulanga imibuzo esimthumele enkundleni yebulenjini eyeWhatsapp kukanti lapho sizama ukumtshayela ucingo ebengadobhi umakhelelekhuhkweni wakhe.

Omunye wamapholisa obuye ukuzothatha isidumbu utshele uzulu ukuthi amabhokisi akoBulawayo lapho ahambe lezidumbu okumele ziyehlolwa.

Facebook Forum

XS
SM
MD
LG