amalinks wokungena

Breaking News

EleBhilithane Lithi Abadabuka eZimbabwe Abasanda Kuxotshwa Kulelolizwe Yizikliwi Zodwa


Omunye wabaxotshwe kwele Bhilithane ukhangelwa ngamapholisa engena abhasini yeZUPCO. (AP)

Uhlangothi lukahulumende wakwele Bhilithane olubona ngendaba zekhaya, olweHome Office, lwethule umbiko ngoLwesine enkundleni yokuxhumana eyeTwitter othi selixotshe elizweni leli abantu elithi yizikliwi ezidabuka kwele Zimbabwe ezilitshumi lane.

Luthi abantu laba, nxa iminyaka yokupika kwabo kuhlanganisiwe, bagwetshwa ukuyahlala entilongweni okweminyaka engamatshumi ayisikhombisa lanhlanu – 75 years. Ngakho-ke luthi siqakatheke kakhulu isivumelwano elisenze lohulumende wakwele Zimbabwe ukuba abantu laba baxotshwe.

Amapholisa amukele abaxotshwe kwele Bhilithane ngoLwesine eRobert Mugabe International Airport. (AP)
Amapholisa amukele abaxotshwe kwele Bhilithane ngoLwesine eRobert Mugabe International Airport. (AP)

Uhlangothi lolu luphinde lwathi kulabantu abadabuka emazweni atshiyeneyo abafika phose inkulungwane eziyisitshiyangalombili – 7,985 abayizigebengu asebexotshwe kwele Bhilithane kusukela ngoZibandlela lonyaka.

Omunye wamagqwetha amele abadabuka eZimbabwe abaxotshwa kwele Bhilithane, uMnu. Pardon Tapfumanei, uthi bazame ngamandla wonke ukuba kuvinjwe ukuxotshwa kwabantu laba.

UTapfumanei uthi bekukhangelelwe ukuba abantu laba bahlale kwele Bhilithane ngoba bangena entilongweni.

Uthi kabasukumele phezulu abanye abangaxotshwa kwele Bhilithane.

UMnu. Nqobani Sithole, olwela ilungelo likazulu, uthi bekumele baxotshwe abantu laba nxa beyizikliwi.

Abazali akade bemelele umntwana oxotshwe kwele Bhilithane bahlezi bezidla ingqondo ngokuxotshwa kwakhe elizweni lelo. (AP)
Abazali akade bemelele umntwana oxotshwe kwele Bhilithane bahlezi bezidla ingqondo ngokuxotshwa kwakhe elizweni lelo. (AP)

Bayakhala abazali abalabantwana abaxotshwe nguhulumende wakwele Bhilithane. Omunye wabo nguNkosiakazi Pretty Muzangazi, othi kuyadanisa ukuba umntwana wakhe uxotshwe kwele Bhilithane ngoba nguye obethengela ukudla lokunye.

UMnu. Frederick Shava, umphathintambo obona ngokudlelana lamanye amazwe, uthi abafike namuhla bavalelwe endaweni yokuzivikela kukhuhlane weCOVID-19 – iquarantine center eHarare njalo kabasoze bahlutshwe nguhulumende.

Uhulumende wakwele Bhilithane ubefisa ukuxotsha abadabuka eZimbabwe abangamatshumi amahlanu – 50 izolo kodwa abanye babo baphanyeke udaba lwabo enkantolo umahluli wavuma ukuba bengabiselwa ekhaya.

EleBhilithane lithi lizabisela abantu abalikhulu lamatshumi amahlanu – 150 eZimbabwe ngenyanga baze basuke bonke abenza amacala ethusayo elizweni leli.

Facebook Forum

XS
SM
MD
LG