amalinks wokungena

Breaking News

NGOs: Akumiswe Ukwenjiwa Kwamadayimana eMarange


Iziphathamandla zenhlanganiso ezizimele zodwa ezihlolisisa ngokwenjiwa kwamadayimana zithi kumele uhulumende amise ukwenjiwa kwamadayimana eMarange ngenxa yokuthi imali etholakala kuleyondawo kayaziwa ukuthi isetshenziswani.

Inhlanganiso lezi ezigoqela iCenter for Research and Development le Zimbabwe Natural Resources Dialogue Forum zithi sokumele kudingwe ingcwethi zokuhlolisisa amabhuku ezemali ukuthi zidungulule okwenzakala eMarange.

Zithi lokhu kuzakwenza ukuthi kubonakale ukuthi kwenzakalani ekwenjiweni amadayimana kuleyo ndawo.

Zithi kulemali enengi okumangalisayo etholakala ekwenjiweni kwamadayimana kodwa kukanya idliwa ngabantu abalutshwana.

Inhlanganiso lezi zithi okuzwisa usizi yikuthi izakhamuzi zeChiyadzwa ezathenjiswa ukuncediswa ngokuthuthela endaweni ezitshiyeneyo zisuka lapho okwenjiwa khona amadayimana lokhe zimelele ukusizwa ngamankampani emba amadayimana eMarange.

Amankampani la agoqela iAnjin Investments, Marange Resources lamanye ambalwa.

Ukuze sihlaziye loludaba, sixoxe loNkosazana Sally Nobuhle Mlambo wenhlanganiso ye Platform for Youth and Development osebenza lezakhamizi zeMarange othi okwenzakala kuleyo ndawo kwephula inhliziyo.
XS
SM
MD
LG