amalinks wokungena

Breaking News

Odokotela Batshaya Phansi Ngenduku Besithi Ababuyeli Emsebenzini


Doctors strike

Odokotela bathi bazaqhubekela phambili bekhalala umsebenzi loba uhulumende esemise ukubaholisa esithi bangeke bathole imali bona bezihlalele ezindlini zabo.

Bathi kuyamangalisa ukuthi uhulumende uthi ukhuphule ama allowances abo ngokuyisilinganiso sokulikhulu ekhulwini – 100 percent, bona befuna ukuthi bathole imali ehambelana lesilinganiso sedola leMelika emkambo wokuthenga lokuthengisa imali.

Odokotela abakhalala umsebenzi
Odokotela abakhalala umsebenzi

UDokotela Tawanda Zvakada, osabambe okwesikhatshana isikhundla sikanobhala jikelele kunhlanganiso yabodokotela eyeZimbabwe Hospital Doctors’ Association, uthi uhulumende ukhuphule ngokuyingcosana imali yama on-call allowances.

“Iholo lethu seligugudeke ngokuyisilinganiso sokwedlula inkulungwane lengxenye ekhulwini – 1,500 kodwa ukulumende uthi ukhuphule iholo ngesilinganiso sokulikhulu ekhulwini – 100 percent. Lokhu kutsho ukuthi ama allowances la akhuphuke kusuka ku1,200 RTGS kusiya ku2,400 RTGS. Kutsho ukuthi sizabe sithola $180 ngennyanga.”

Uthi kuzwisa usizi ukuthi sebelesikhathi eside bekhalala umsebenzi.

“Kasikuvumi lokhu esikuphiwe nguhulumende. Namuhla sifikisa iminyaka engamatshumi amahlanu lanye sikhalala umsebenzi. Lokhu singenelisi ukuya emsebenzini ngenxa yeholo eliphansi. Uhulumende kaphume lento ezwakalayo.”

Badla amalahle odokotela kwele Zimbabwe
Badla amalahle odokotela kwele Zimbabwe

UZvakada uthi ngokwenzakala emkambo wemali namuhla bekumele ukuthi bahole imali efika 16,800 RTGS.

“Sifuna kulungiswe konke lokhu okuhluphayo. Kusiya ngokwenzakala emabhanga namuhla bekumele sithole 16,8oo RTGS hatshi i2,400 RTGS. Kuncane kakhulu uhulumende afuna ukusipha khona.”

Uthi akwaziwa ukuthi udaba lolu luzaphethangani.

“Asikuthakazeleli okwenzakalayo njengoba odokotela bengenelisi ukuya emsebenzini.”

Uthi abantu sebehlupheka ezibhedlela ngenxa yabodokotela abakhalala umsebenzi lohulumende ongazwakaliyo ngokukhuphula iholo labo.

Bathwele nzima abantu ezibhedlela.
Bathwele nzima abantu ezibhedlela.

“Kuyadanisa okwenzakala kuzigulane kodwa akulanto esingayenza. Abantu bayingxenye yethu, abanye njalo bayizihlobo zethu. Uhulumende nguye okumele alungise udaba lolu.”

UZvakada uphinde wathi bazimisele ukuxoxa ngodaba lolu lohulumende.

“Sizimisele ukusebenza lohulumende ngodaba lolu. Sifisa ukuxoxisana ngabakuphetheyo.”

UDokotela Paulinus Sikosana, okuhlantothi oluqhatsha odokotela eyeHealth Service Board, uthi odokotela abafuni ukukhulumisana lohulumende ngokukhuphulwa kweholo labo.

Ingcwethi kwezempilakahle ezimele yodwa, uDokotela Elophi Sibanda, uthi kumele uhulumende akhulumisana labodokotela ukwenzela ukuthi kulungiswe udaba lokukhalala kwabo umsebenzi.

Kukhanya kusakude phambili ukuthi kulungiswe udaba lolu ukwenzela ukuthi odokotela babuyele emsebenzini.

Odokotela Bathi Bafuna Iholo Elikhuphulwe Ngokuhambelana Ledola leMelika
please wait

No media source currently available

0:00 0:04:21 0:00


Facebook Forum

XS
SM
MD
LG