Uhulumende uthi sokumele kumiswe iholo labodokotela asebelensuku ezilutshumi lambili bekhalala imisebenzi bekhonona ngokungaphathwa kahle nguhulumende, iholo eliphansi lokunye okufanayo.
Unobhala wohlangothi lukahulumende lwezempilakahle, uDokotela Gerald Gwinji, usanda kwethula umbiko lo lapho aveze khona ukuthi kulicala okwenziwa ngamadokotela.
Uthi ngaphansi kweziqondiso zomthetho owethulawa nguhulumende ngomnyaka ka2000, kumele bonke abaphathintambo bakahulumende ezibhedlela babone ukuthi iholo labodokotela liyamiswa kusukela lamuhla.
UDokotela Gwinji uthi kumele abaphathintambo laba bahambise imbiko yokumisa iholo labodokotela kuhlangothi lukahulumende olwe Salary Service Bureau ngokutshetsha.
Uthi akumelanga izisebenzi zingayi emsebenzini zingacelanga kubaphathintambo bakahulumende.
Odokotela batshaya phansi ngenduku besithi kababuyeli emsebenzini.
Umphathintambo wezempilakahle, uDr. David Parirenyatwa ngoLwesibili ucele odokotela ukuba babe lozwelo ebantwini base Zimbabwe, bame ukukhalala umsebenzi, udaba lwabo lusalungisiswa nguhulumende.
Odokotela abaphansi kwenhlanganiso yeZimbabwe Hospital Doctors Association (ZHDA) batshaya phansi ndenduku besithi kababuyeli emsebenzini uhulumende engakalungisisi lokho abakhala ngakho.
Bafuna uDr. Parirenyatwa axolise ngokutshela uzulu ukuthi sezilungisisiwe izikhalazo zabodokotela ezibangele ukukhalala kwabo umsebenzi.
Kungxoxo lentathelizindaba emkhosini wokunanza usuku oluqakathekisa impilakahle yemlonyeni lwe World Oral Health Day owenzelwe eHarare Gardens, uParirenyatwa ubekhanya ezwisa usizi ecela odokotela ukuba babuyele emsebenzini, babe lozwelo ebantwini laloba bemzondele umqatshi wabo.
Lanxa lokhu kungasi kwakuqala odokotela bekhalala umsebenzi, uParirenyatwa uthi okunye okubangela inhlupho ezikhona phakathi kwabodokotela lomqatshi yisimo somnotho welizwe, ongemuhle.
Kodwa isikhulumeli sabodokotela phansi kwenhlanganiso yeZHDA, uDr. Mxolisi Ngwenya, uthi ababuyeli emsebenzini zize zilungisiswe zonke izikhalazo zabo.
Ukhuthaza abasezikhundleni zaphezulu kugatsha lwezempilakahle, uDr. Ngwenya ukuba mababuyele kuzulu bayemtshela okuyikho okwenzakalayo ekuxoxisaneni labo.
Odokotela laba sebelensuku ezingamatshumi amabili (20 Days) selokhu baqalayo ukukhalala umsebenzi bekhala ngendlela abaphathwa ngayo emsebenzini, iholo eliphansi, ukusilela kwempahla yokusebenzisa lokunye okunengi nengi.
Inhlanganiso ezizimeleyo ezisebenzisana lozulu elizweni, okugoqela eyamagqwetha alwela ilungelo loluntu eye Zimbabwe Laywyers for Human Rights lazo zikhuthaza uhulumende ukuba alungisise udaba lokukhalala umsebenzi kwabodokotela ngokuphangisa, ukulondoloza impilo yabantu esisengozini.
