amalinks wokungena

Breaking News

Uzulu Usevunyelwa Ukusebenzisa Idola leMelika Lemali Yamanye Amazwe eZimbabwe


FILE: Bathengiselana imali emgwaqweni eZimbabwe. (AP Photo/Tsvangirayi Mukwazhi)
FILE: Bathengiselana imali emgwaqweni eZimbabwe. (AP Photo/Tsvangirayi Mukwazhi)

Ibhanga leZimbabwe Reserve Bank lithi abantu sebevunyelwa ukusebenzisa idola leMelika lemali yakwamanye amazwe.

Ibhanga leli lethule umbiko lo ngoLwesine emini yantambama lisithi lokhu kwenzelwa ukuthi abantu benelise ukuthenga abakufunayo ngesikhathi ilizwe lilwisana lomkhuhlane weCoronavirus COVID-19.

Kwamiswa ukusetshenziswa kwedola leMelika lemali yakwamanye amazwe nyakenye uhulumende esithi ufuna kusetshenziswe ama bond notes leReal Time Gross Settlement dollar.

Kumbiko walo omutsha lo, ibhanga leli lithe uzulu ulakho ukuthenga konke akufisayo ngedola leMelika lemali yakwamanye amazwe njengoba kukhanya kulokusilela kwempahla etshiyeneyo ethengeka kahle ngemali le.

“Ibhanga leReserve Bank of Zimbabwe lifisa ukwazisa abantu ukuthi lokhu kulakho ukwenza kube lula ukuthi uzulu athenge impahla etshiyeneyo ngesikhathi lesi esinzima nxa esebenzisa yonke imali alayo ekuthengeni impahla lokunye.

“Lapha sikhangele njalo lokungenelisi kwethu ukuthi sithole imali yakwamanye amazwe esincedisa ukuthi sithenge esikufisayo.”

Uzulu wakhala okumangalisayo nyakenye kumiswa ukusetshenziswa kwedola leMelika lemali yakwamanye amazwe ekuthengeni impahla elizweni.

Ingcwethi kwezenotho zithi uhulumende wenze lokhu ngenxa yokuthi ubevele sephakathi kwelitshe lembokodo ezama ukuvuselela umnotho obhidlika okumangalisayo.

Zithi uhulumende utshaye ebambile kulandela ukuqhamuka komkhuhlane weCoronavirus COVID-19 osecatsha ngawo ukwenzela ukuthi uzulu asebenzise idola leMelika ekuthengeni impahla eZimbabwe.

XS
SM
MD
LG