Bayakhala abathenga bethengisa impahla emigwaqweni abathi ukugugudeka kwemali yohlobo lwama bond notes kwenza ukuthi balahlekelwa yimali enengi.
Bathi imali le isigugudeke okokuthi iyaphela isisindo isesikhwameni somuntu njengalokhu okwekusenzakala ngesikhathi ilizwe lisebenzisa ama bearers’ cheques alahlwa nguhulumende owathatha isinqumo sokuthi kusetshenziswe imali yamazwe atshiyeneyo ngomnyaka ka2009.
UNkosazana Pretty Mpofu, othenga ethengisa impahla emigwaqweni, uthi sebethwele nzima.
Isisindo semali ethunyelwa emafonini, okuthiwa yi-RTGS, sesehlile ngemva kokuqansa ngokuyisilinganiso sokungamatshumi amahlanu ekhulwini – 50 % - ngelanga kusukela ngeviki ephelileyo. Kusiyafika ngoLwesithathu ekuseni idola elilodwa leMelika beselithengwa ngamadola amane lanhlanu, $4.50.
Kodwa kusiyafika ntambama idola elilodwa efonini belithengwa ngamadola amane kuphela, $4. Lokhu kwenzakala ngesikhathi abanye osomabhizimusi bengasemukeli imali yohlobo lwama bond notes.
Ukuze sizwe okunengi ngodaba lolu uChris Gande weStudio 7 uxoxe loMnu. Albert Mhlanga, usomabhizimusi okubandla leMDC.
Inhlanganiso yeZimbabwe National Chamber of Commerce ithi amankampani amanengi athwele nzima ngokuswela imali yeMelika, yikho nje eqhubeka evala.
Ithi njalo amanye awo ayavala ngoba engafuni ukuthengisela abantu impahla yawo ngemali yebond kanye lamaRTGs. Sixoxe lomgcinisihlalo weZNCC eMatabeleland.
