Abesifazane abane bathi uMnu. Donald Trump oncintisa kukhetho lokudinga umongameli omutsha eMelika waba bambabamba ezithweni zomzimba bengamvumelanga.
Amaphephandaba agoqela eleNew York Times, iPalm Beach Post lePeople Magazine, aveze ukuthi abesifazane laba babanjwa ngenkani besendizamtshineni, emawofisini kaTrump, ewoteleni lendaweni yokukholisa eye Mar-a-Lago Casino eFlorida.
Abesifazana laba nguJessica Leeds, Rachel Cooks, Mindy McGillivray lo Natasha Stoynoff. UTrump, osanda kuphuma kumabonakude ezitshaya isifuba esithi uyabathanda abesifazane ababambabamba noma bengavumanga, uthi kazange akwenze lokhu.
Izikhulumeli zika Nkosikazi Hillary Clinton, oncintisana loTrump kukhetho lolu, zithi konke lokhu kutshengisa ukuthi uTrump waqamba amanga kungxoxo mpikiswano abayenza ngeSonto lapho atshele khona umphakathi ukuthi kazake abambabambe abesifazane bengafuni.
UNkosikazi Michelle Obama utshele uzulu ukuthi kuyayangisa okwenziwa nguTrump.
Ukuhlaziya udaba lolu, uGibbs Dube weStudio 7 uxhume uNkosazana Sibongile Ncube, isizalwane seZimbabwe esihlala eMelika, othe abesifazane sokumele batshengisele ezitaladini bekhonona ngalokhu okuthiwa kwenziwa nguTrump.
