amalinks wokungena

Abantu Abafuna Ukutshengisela Ngokwethulwe NguEddie Cross Bavinjwa Ngamapholisa


Amapholisa avimbe abantu abafuna ukutshengisela besola okwethulwe nguMnu. Eddie Cross.

Amapholisa avela eTshabalala Police Station abehlome egan’unwabu, avimbe ukutshengisela ngoLwesithathu obekujonge ukumelana lenkulumo yomela indawo yeBulawayo South edale lephalamende, uMnu. Eddie Cross, owetheswa incala lokuthuka isizwe saMaNdebele.

Amapholisa ahlomileyo avuke evimbe igalaji leTshabalala elithengisa amafutha ezimota lapho obekuzaqalisa khona ukufola kwabatshengiselayo besiyaphelela emawofisini ekhansili kaMsitheli.

Abakhonona ngokwethulwe nguCross bacine bebuyela ngekhaya kungelakulwisana lamapholisa. Bathe badane kakhulu ngesenzo lesi samapholisa.

Unobhala jikelele wenhlanganiso yeIbhetshu LikaZulu, uMnu. Mbuso Fuzwayo, obeqoqe utshengisela lokhu, uthi kuyadanisa ukuba amapholisa abayalele ukutshengisela esithi noma bemisiwe bazaqhubekela phambili kusuku abazaluhlela ngoba ngeke bayekelela uCross ethuka abantu.

Umongameli weMRP, uMnu. Mqondisi Moyo, omunye wabavinjwe ngamapholisa ukutshengisela, uthi ukuvinjwa kwabo akubathokozisi njalo uCross abekwazi ukuthi kabayemukeli inkulumo yakhe.

Isakhamuzi sendaweni yeBulawayo South, uMnu. Melusi Tshuma, laye uthe kumzwisa ubuhlungu ukuba umuntu abamvotelayo usebathethisa aphinde avikelwe ngamapholisa.

Osakhulayo, uJoseph Phiri, laye uthe kuyamzondisa kakhulu lokhu. Usole ukusekelwa kukaCross esithi kukhanya inkulumo yakhe ivunyelwa ngumbuso okhona.

UClearance Ndlovu laye wethese uCross icala lokudelela abantu esithi inkulumo yakhe imbi njalo ikhombisa ukuba ulobudlelwano lebandla elibusayo ngoba kuyibo abavame ukukhangelela phansi eminye imihlobo ezweni.

Kumaviki ambalwa edluleyo, uMnu. Cross uchothoze kabanzi abantu beMaNdebeleni okutshiye inengi labo licaphukile lisithi kahloniphi uzulu.

Abatshengiselayo bathe bazaqhubekela phambili bedinga imvumo yokutshengisela kungakhathalekile ukuthi balakho ukuvinjwa ngamapholisa.

Facebook Forum

XS
SM
MD
LG