Annastacia Ndlovu
Abantu bathi izimiso zamabandla wonke angene kukhetho lwalonyaka aphose afane kodwa bakhangelele iZimbabwe elombuso owehukele kulokwenzakala okwamanje njalo ozaqala ukuvuselela ezomnotho.
UNkoszana Jacquiline Ndlovu uthi kwezomnotho amabandla ethula okufanayo bona bakhangelele ukuvuselelwa komnotho abantu bathole imisebenzi.
“Izimiso esezethulwe ngamabandla akhankasayo ziyafana phose zonke, esesikukhangelele yikuthi nemva kokhetho bavuse ilizwe kwezomnotho njalo baze bazosibuza esikukhangeleleyo.”
Evumelana loNdlovu, uMnu. Joseph Phiri, uthi bakhangelele umbuso wezabelo ozavusa uBulawayo.
“Imanifesto yethu ikhuluma ngombuso wezabelo kanye lokutholisa abantu besigaba umsebenzi, kungaphumelela sikhangelele ukukhuphuka kwezomnitho.”
Osakhulayo uThubelihle Ncube uthi ngemva kokhetho bakhangelele ukuba amabhanga atholise abantu imali.
Isakhamuzi sakoBulawayo, uMnu. Liberman Bhebhe, uthi kunengi abakuthenjisiweyo njalo izimiso lezi zehlukile kulezimele zenziwe masinya lezizathatha isikhathi.
“Ibandla elizanqoba kumele liqakathekise amathuba okutholisa abasakhulayo imisebenzi nendawo, udaba lokusilela kwemali kulungiswe kanye lokuqakathekisa ezomnotho.”
Abantu abanengi bathi bakhengelele ukuthi kuzakuba lenguquko kwezombusazwe lezomnotho kulandela ukhetho oluzakwenziwa ngoMvulo.