amalinks wokungena

Breaking News

'Asikwazi Ukuthi Sizavotela Bani Kukhetho Lonyaka'


Izakhamuzi zakoBulawayo zithi sezilungiselele ukuvota kukhetho lwalonyaka kodwa azikabikwazi ukuthi kuvotelwa bani ngoba kulokhe kugcwele ukungezwani emabandleni ezombusazwe wonke.

Abantu abanengi abakhulume leStudio 7 ngoLwesine bathe sebebhalise amagama abo kugwalo lokuvota kodwa baswele abantu abangabavotela.

UMnu. Thomas Ndlovu uthe kakaboni ukuthi uyavotela bani ngoba usasindwa yikuthi akulamuntu abona engani engamvotela.

Uthe akubonakali ukuthi kungaba lomuntu ozalwela konke okubhekane lozulu njalo uhulumende kaMongameli Emmerson Mnangagwa ukhanya ekhuthalele ukuguqula indlela ibandla leZanu PF elisebenza ngayo hatshi ukumele inhlupho zikazulu.

Esinye njalo isakhamuzi sakoBulawayo, uNkosikazi Nkosinesisa Moyo, uthe uselungiselele ukuvota kodwa okunzima kuye yikuthi akakwazi ukuthi kuvotelwa bani ngoba kakaboni abantu abakhankasela ukuvotelwa.

Abanye abantu asebebhalise kugwalo lokuvota bathi akwaziwa ukuthi bazavotela bani.
Abanye abantu asebebhalise kugwalo lokuvota bathi akwaziwa ukuthi bazavotela bani.

Osakhulayo ophila ngokuthengisa impahla etshiyeneyo emigwaqweni, uMnu. Victor Chirara, uvumelane loNdlovu loNkosikazi Moyo esithi usebhalisile kugwalo lokuvota kodwa akucaci ukuthi uzavotela bani.

UMnu. Thamsanqa Ncube, ongusomabhizimusi osakhulayo, uthe akakalulungiseleli ukhetho ngoba ucabanga ukuthi akumelanga lube khona.

Uthe kufanele uMnangagwa aphiwe ithuba lokuguqula indlela okwenziwa ngayo ukhetho eZimbabwe kungakenziwa ukhetho lonyaka.

UNkosikazi Chantelle Siziba uvumelane laye esithi akakabhaliseli ukuvota ngoba kakwazi ukuthi kuvotelwa bani.

Ukhetho lukhangelelwe ukuba khona kungxenye yakuqala yalonyaka kodwa lokhe kungakaziwa usuku oluqondileyo oluzakwenziwa ngalo njalo uhlelo lokubhalisela ukuvota luyaqhubekela phambili kusukela kusasa kusiya mhlaka 13 ngoNhlolanja.

Amabandla aphikisayo lenhlanganiso ezizimeleyo zakhankasela ukuthi uhlelo lolu lwengezelelwe insuku ngoba abantu ababhalisele ukuvota bengaphansi kwenani elikhangelelweyo.

Kukhangelelwe ukuthi kubhalise abantu abayizigidi eziyisikhombisa kodwa lokhe kubhalise abantu abangaphezu kwezigidi ezine.

Udaba Esilethulelwe NguBathule Masuku
please wait

No media source currently available

0:00 0:03:16 0:00

Facebook Forum

XS
SM
MD
LG