amalinks wokungena

Breaking News

Osomabhizimuzi Lezakhamizi koBulawayo Bakhala Ngokusilela Komlilo Kagetsi


Zimbabwe Power Station.

Ukucitshwa kwamandla kagetsi sekutshiye abamabhizimusi bekhala ezimathonsi ngokulahekelwa yisikhathi sokusebenza.

Uzulu laye ukhala ngokutshontshelwa intambo zamandla kagetsi kanye lokugqekezelwa ezindlini ngenxa yomnyama.

Ukucitsha kwamandla kagetsi kuqhubekela phambili endaweni ezinengi zelizwe, uzulu eveza ukuba lokhu kubuya lengozi enkulu kuzakhamizi lamabhizimusi.

UMnu. Meluleki Mloyi, usomabhizimusi wakoBulawayo, uthi akusasebenzeki ngenxa yaloludubo.

"Ukuhamba kwamagetsi kulezinsuku kuyasihlukumeza kakhuluthina esikumabhizimusi, sibhekane leCorona izikhathi zokungena emsebenzini sezifinyeziwe akusasebenzeki kuhle amacustomer awasatholi izinto abazifunayo ngesikhathi esiyiso njalo ngemfanelo. Nxa amagetsi eqhubeka kuzabanzima ukuthi siproduce amaproducts enough njengoba uhulumende ubesekhulumile ukuthi kusiyafika u22 December sibesesivala amafactory."

UNkosikazi Sandra Mathuthu, isakhamuzi seNketa, ukhathazwa yikuswelakala komlilo kagetsi.

"Khathesi yisikhathi sezulu kunzima nxa kungela magetsi ngoba thina abanye asenelisi ukuthenga igas, ukubasa umlilo kunzima kuyabe sekusebusuku kungabaseki umlilo phandle sekusesabeka umnyama.”

UNkosikazi Thandiwe Sibindi, isakhamuzi sakoBulawayo, ukhala ngokwanda kwamasela emnyameni.

“Besinanzelela ukuthi ukutshontshwa kwama cables amagetsi bekusenzakala laloba amagetsi ekhona .Khathesi ngeload shedding kuzaba worse njalo okubuhlungu yikuthi liyahlala amalanga kungalungiswanga ,ikanti ngabe bayakunanzelela ukuthi ubusela buzakwanda kakhulu hayikhona okwentambo zamagetsi kuphela.”

UNkosikazi Sanele Ntuli, ongusomabhizimusi, uthi amabhizimusi abo mancane kakhulu okokuthi abenelise ukuthenga amagenerator.

"Amabusiness ethu adonsa nzima ngenxa yezizatho ezinengi kodwa lokhu okwamagetsi kusuke kubephambili ngoba asila eyinye indlela esingayisebenzisa ukuthi imitshina yethu isebenze, asila mali yokuthenga amagenerator kunzima kakhulu ngoba kithi ngoba sisacathula."

Inkampani epheka amandla kagetsi eyeZESA, ikhiphe umbiko isazisa uzulu ukuthi indawo ezinkulu ezintathu ezigaya Amandla kagetsi ebezingasebenzi esithitshini seKariba South Hydro Power Station kulungiswa idamu sezilungisiwe njalo sezisebenza.

Ukuqala ukusebenza kwalezindawo kwengeze amagetsi ngesilinganiso samawatts edlula amakhulu amathathu- 345Megawatts okuyikho okukhangelelwe ukwehlisa udubo lokucitshwa kwamagetsi obesekusenzakala.

Ngokuyaphambili abeZESA bazise uzulu ukuthi amagetsi azakuma ukucitsha ngesikhathi sekhisimusi kusukela mhlaka 16 Mpalakazi. Uzulu ukhuthazwa ukusebenzisa amagetsi ngendlela ewalondolozayo.

Facebook Forum

XS
SM
MD
LG