Sokulabantu abedlula amakhulu amathathu lamatshumi amahlanu – 356 asebehlolwe batholakala belomkhuhlane weCoronavirus COVID-19 eZimbabwe.
Uhlangothi lwezempilakahle luthi phakathi kwenani leli, sokubhubhe abane kwasila abangamatshumi amahlanu lane – 54. Luthi sokuhlolwe abantu abafika phose inkulungwane ezingamatshumi amahlanu – 58,239.
Abantu abanengi abatholakala belomkhuhlane lo kulez’insuku yilabo ababuyela ekhaya bevela kwele South Africa.
Emhlabeni wonke jikelele, isibhedlela seJohns Hopkins University sithi sokulabantu abafika phose izigidi eziyisitshiyangalombili – 7,808,773 abahlolwe batholakala belomkhuhlane weCOVID-19. Abantu abedlula inkulungwane ezingamakhulu amane – 430,542 sebebhubha. Uyamemetheka umkhuhlane lo kwele Melika lapho osubulele abantu abedlula inkulungwane ezilikhulu.
Kusenjalo, uMongameli Emmerson Mnangagwa uthi abantu kumele bathandaze kusasa ngosuku athi yi-Presidential National Day of Prayer and Fasting ukwenzela ukuthi umkhuhlane weCOVID-19 ungamemetheke ngamandla. Kodwa-ke kulabantu abanengi, okugoqela abafundisi abathi bekumele axolise uzulu ngokwenzakala elizweni engakabeki usuku lolu. Omunye wabachothoza indlela uMnangagwa ethule ngayo lokhu nguMfundisi Useni Sibanda.
Uthi bekumele uMnangagwa azikhangele ukuthi wenza njani engakabeki usuku lolu.
Lokhu kusekelwa nguMnu. Bekezela Maduma, isakhamuzi seGwanda, othi uMnangagwa bekumele anike abafundisi ithuba lokukhulumisana lozulu.
UNkosazana Carolyn Moyo usekela umbono kaMaduma esithi kumele uMnangagwa alungise udaba lombhuqazwe weGukurahundi.
UMnu. Sibusiso Matshazi, olombono ofanayo, uthi abantu eMatabeleland leNkabazwe bamanxebanxeba ngenxa yakhe ngakho-ke kumele aguqule izenzo ukwenzela ukuthi ahlonitshwe ngabantu elizweni lonke jikelele.
Kodwa bakhona abamsekelayo abanjengo Mnu. Peter Ngwenya abathi umongameli wenza okufiswa nguzulu.
Bayakusekela abanengi abakubandla elibusayo. Omunye wabo nguMnu. Believe Gaule othi uMnangagwa ufisa ukuthi ilizwe lilwisane lomkhuhlane lo ngamandla.
Akwaziwa ukuthi abanye abantu bazakulandela kumbe hatshi okwethulwe nguMnangagwa.
