amalinks wokungena

Breaking News

Emmerson Mnangagwa: Sizakwenza Ukhetho Olubalulekileyo Lonyaka eZimbabwe


UMongameli Emmerson Mnangagwa
UMongameli Emmerson Mnangagwa

UMongameli Emmerson Mnangagwa, owethekelela eleBotswana, usethembise njalo ukuthi eleZimbabwe lizaqhuba ukhetho olukhululekileyo lonyaka.

Ekhuluma ngoMvulo edolobheni leGaborone, uMnangagwa unxuse osomabhizimusi beBotswana ukuthi bayevula amakampani eZimbabwe, ngoba uhulumende wakhe esebenza gadalala ukwenza imthetho ezakhanga amabhizimusi avela phandle kwelizwe.

UMnangagwa utshele abakade bengene kudili lokudla kwemini alenzelwe nguMongameli Ian Khama eGaborone, ukuthi eleZimbabwe lizimisele ukuba lokhetho olukhululekileyo.

Unxuse inhlanganiso ezingabe zilesifiso sokuyabona ukuthi ukhetho luzaqhutshwa njani, esithi zikhululekile ukwenza njalo.

UMnangagwa uthethe ithuba lokunxusa amabhizimusi eBotswana ukuthi avule amakampani eZimbabwe esithi uhulumende wakhe usendleleni yokulungisa yonke imthetho engahambelani lokuvula amabhizimusi.

Utshele umphakathi ukuthi eleZimbabwe selivuliwe ukuthi likhange kahle abamabhizimusi. Uthi osomabhizimusi abavela phandle kwelizwe, bazakwenelisa ukuthi babuyisele inzunzo amazweni abo, kulandelwa umthetho ovunyelweyo wokuthumela imali.

Mnangagwa uthethe isikhathi ekhuluma ngezehlakalo zika mhlaka 15 Lwezi nyakenye lapho ibutho elahluthuna intambo okwadala ukuthi umnunzana Robert Mugabe acine asehlika esikhundleni.

UMnangagwa uthi okwenzakalayo ngoLwezi kwakuqakathekile ukuze kulungiswe okwasekonakele elizweni.

UMnangagwa kanye loKhama bathi bekuqakathekile ukuthi bahlangane ngoba ubudlelwano phakathi kwamazwe womabili basebonakele ngaphansi kowaye ngumongameli umnunzana Mugabe.

UKhama loMugabe babengabonani ngalihlo, njalo uKhama uthi lokhe wangena esikhundleni ngomnyaka ka 2008, ngokwakuqala ukuthi umongameli weZimbabwe avakatshele uhulumende weBotswana.

UKhama uthe eleBotswana lizimisele ukuncedisa iZimbabwe kundlela yayo yokulungisa umumo womnotho.

Kusenjalo, uMnangagwa ukhulume edale lephalamende eGaborone, ngemva kokudla kwemini loMongameli Khama.

UMnangagwa utshele idale lephalamende ukuthi uyabonga ukuthi iBotswana ingcine inkulungwane lenkulungwane zabeZimbabwe ababalekela isimo esibi somnotho.

Uthe ukhangelele ukwamukela izizalwane zeZimbabwe, konke labo mkabo ababathole eBotswana, isimo somnotho eZimbabwe singabangcono.

UMnangagwa ugqiba uhambo lwakhe kweleBotswana kusasa, lapho azakhulumisana labosomabhizimusi beZimbabwe ekuseni, abesevakatshela inkampani elolonga amadayimani, eDiamond Trading Company.

XS
SM
MD
LG