amalinks wokungena

Breaking News

UMnangagwa Ukhuthaza Abantu Ukuthi Babambane Njalo Uncoma Ukuvuselelwa kweNational Youth Service


UMongameli Emmerson Mnangagwa.
UMongameli Emmerson Mnangagwa.

UMongameli Emmerson Mnangagwa uthi kumele abantu babambane eZimbabwe ukwenzela ukuthi kuguqulwe umnotho welizwe obungathuthuki ngamfanelo eminyakeni eminengi edluleyo.

UMnangagwa wethule amazwi la namuhla kunanzwa usuku lukazibuse phansi kwesihloko esithi ‘Zimbabwe at 41: Together, Growing our Economy for a Prosperous, Resilient and Inclusive Society’.

Uthe kumele abantu bakhangele obekusenzakala elizweni kusabusa owayengumongameli umuyi uRobert Mugabe lokwenzakala okwamanje ukwenzela ukuguqula umnotho lokunye.

“Asikhangeleni phambili ukwenzela ukuthi sivulele indlela umuntu wonke lalabo abazazalwa. Okwamanje sizimisele ukuthuthukisa ilizwe lethu ngazo zonke indlela ukwenzela ukuthi sithole esikufunayo. Lokhu kuzakwenza abantu baphumelele, bahlale kahle njalo umnotho uthuthuke ngemfanelo. Lokhu yikho okuzakwenza sisebenzelane kahle lamanye amazwe.

“Asibambaneni sibelombono ofanayo, sihambe kanye kanye ukwenzela ukuthi siyefika sindawonye lapho esiye khona. Nxa sibambisene sizafika lapho esiyakhona sincediswa nguNkulunkulu.”

Uphinde wathi kuqakathekile ukuvuselela uhlelo lwabatsha olweNational Youth Service oluchothozwa ngabantu abanengi abathi lusetshenziswa nguhulumende obamba abantu ngenkani ukuba bamvotele esebenzisa abalolongwa kuhlelo lolu.

UMnangagwa uthi uhlelo lolu lwenza abantu basekele ilizwe labo ngendlela ephezulu, bathole imfundiso etshiyeneyo yokuziphilisa njalo basebenze kakhulu ekuthuthukiseni ilizwe labo.

UMnangagwa uphinde wathi uhulumende wakhe ufisa ukuhlonipha ngemfanelo bonke abantu abalwela inkululeko.

Uthi okunye yikulungisa isithombe sika Mbuya Nehanda, esizakhumbuza abantu ngokwenziwa nguye kuqala ukulwisana labamhlophe.

Uphinde wathi abantu akumelanga besabe amajekiseni okuvuselela amasotsha emizimba awokulwisana legciwane leCOVID-19.

Uthi amajekiseni asetshensizwa eZimbabwe ahlolwa luhlangothi oluhlolisisa imithi olweMedicines Control Authority of Zimbabwe.

Ngomhlabathi owaphiwa abansundu, uMnangagwa uthe uhlelo lolu kalusoze lubiselwe emuva ngoba luthakazelelwa nguzulu.

Uthi abalwisana labamhlophe babefuna umhlabathi ngakho-ke abanye abantu sebewutholile.

Uphinde wathi ilizwe likhangelelwe ukutshaya inala lonyaka kulandela ukuna kwezulu kahle endaweni ezinengi eZimbabwe.

Uthi uhlelo lwePfumvudza/Intwasa Programme lusekelwa ngolukamongameli olokunika abantu inhlanyelo, kukhanya luphathwe ngemfanelo njalo abalimi bazaphiwa imali yabo ngesiphangiphangi bangahambisa abakuvunileyo eGrain Marketing Board.

Kusenjalo, uhulumende wakwele Melika wenzela eleZimbabwe amhlophe ngosuku lokunanza uzibuse lisithi kumele kulungiswe eminye imithetho okumele ihambelane lesisekelo sombuso welizwe.

UMnu. Antony Blinken, okuhlangatho lukahulumende olubona ngokudlelana lamanye amazwe, uthi kumele uhulumende kaMnangagwa akhuthaze ukusebenza lamanye amabandla ukwenzela ukuthi ilizwe lithuthuke ngemfanelo.

XS
SM
MD
LG