amalinks wokungena

Breaking News

UMnangagwa Uthi Abantu Abangahlatshwanga Ijekiseni yeSinopharm Kabasoze Bathole Imisebenzi


UMongameli Emmerson Mangagwa lomsekeli wakhe, uMnu. Kembo Mohadi, ngesikhathi bevula okusemthethweni impompi zezibholani eNyamandlovu ngoLwesine. (Photo: Ezra Tshisa Sibanda)

UMongameli Emmerson Mnangagwa uthi uzahlatshwa ijekiseni yomuthi weSinopharm eyokwenqabela igciwane leCoronavirus, endawonye leziphathamandla zakhe kungxenye yomuthu lo ebuyayo kumaviki alandelayo.

UMnangagwa ubekhuluma ngemva kokuvulwa kwezibholane ezingamatshumi amabili - 20 zeEpping Forest eNyamayendlovu ngoLwesine, kunye lokusungulwa kohlelo lokulethela idolobho lakoBulawayo amanzi evela eGwayi-Shangani.

UMnangagwa utshele uzulu kulumbuthano ukuthi ijekiseni yeSinopharm bengayesabi ngoba ayibulali njengokutshiwo ngabantu bezixoxela emakhasini okuzilibazisa, awe social media.

Uthe isibonelo ngumsekeli wakhe, uMnu. Constantino Chiwenga, onguye njalo umphathintambo wezempilakahle owahlatshwa ngeviki ephelileyo njalo olokhe eziphilele.

"Ivaccine kayibulali nangu ukhona umsekeli webandla, umsekeli welizwe ukhona uyaphila."

Uthe abantu abangahlatshwanga ijekiseni le bazakwalelwa ukungena emabhasini njalo kabasoze baqhatshwe emisebenzini etshiyeneyo.

Ubonge uhulumende weChina osengezelele izipho zama donations akhe evaccine kulandela azithumela ngeviki ephelileyo.

"Ngibonga abantu be China lohulumende weChina, izolo basinike njalo eyinye 200 000 ivaccine, ugatsha lwezempilakahle lusebenza loNcube sebethenge 600 000 vaccine ezahlatshwa abantu ekuqaleni kukaMbimhitho leyinye njalo amavacine ayi1.2 million."

UMnangagwa uthembise uzulu wako Bulawayo ukuthi udubo lwamanzi soluzaphela ngoba azakuba yitakalaka agcwale yonkindawo kontuthuziyathunqa ngemva kwesikhatshana esibuyayo.

"Umsebenzi wokudonsa impompi engama kilometre angu 245 usuka ku Gwayi-Shangani usuqalile njalo ukhangelelwe ukuphela ngoDecember ka 2022 ngomnyaka ozayo."

UMnu. Richard Moyo, umphathintambo obona ngokuthuthukiswa kwesabelo seMatabeleland North, ujabule kakhulu ngohlelo lwe Gwayi-Shangani dam.

"Thina sithanda ukubonga kakhulukakhulu uPresident ubaba uMnangagwa ngoba udaba lolu lwe Gwayi Shangani Dam le-pipeline esuka eGwayi Shangani isiza koBulawayo kwakhulunywa ngabo 1912 but nge new dispensation kababa uMnangagwa nanku uzinto seziqalisile ukwenzakala. Sibonile igroundbreaking yepipeline about 245km ipipeline eyabe isuka eGwayi Shangani izoncedisa amanzi koBulawayo."

UNkosazana Judith Ncube, umphathimtambo obona ngokuthuthukiswa kwesabelo sakoBulawayo, ubonga amanzi azanceda izakhamizi zako Bulawayo ezihlezi zikhala ngamanzi.

"Silokuthaba okumangalisayo ukuthi at least i20megalitres zonezi ezizabe zisithontela zingenisa koBulawayo izakhamizi zizuza amanzi it makes a big difference, sithanda ukubonga kakhulu ngalokhu okwenzakeleyo."

Usodolobho wako Bulawayo uCouncillor Solomon Mguni laye ubekhona kulumcimbi wokuvulwa kwezibhorane, njalo ugcizelela amazwi kaMaNcube.

"Thina njenjabaphathi bedolobho lako Bulawayo, uhlelo lwe Urban forest kanye lolwe Rochester Farm project eNyamayendlovu luphutshile so kutshukuthi Urban forest sokwengezelelwe eingathi 10megalitres zamanzi azobuya koBulawayo kanye lase Rochester.

Izakhamizi zijabule kakhuli ngohlelo lwamanzi.

"Mina ngingu Samantha Ndlovu sijabulile indaba yamanzi le asuka eZambezi sengathi engahlala ekhona besesithwele nzima kakhulu koBulawayo, nginguPhilani Sibanda, ngithanda ukubonga indaba yamanzi lapha esifikile kithi eNyamayendlovu, sesizathi ukulima nje lathi njengabantu abatsha besesikhathele ukuba ngolova. Mina nginguEllen Sibanda sithanda ukubonga indaba yamanzi, amanzi sekhona lathi sesikhona ukuthi sikwanise ukuthola amanzi eduzane, amanzi ayimpilo."

Izakhamizi zako Bulawayo zithwelenzima ngokuswelakala kwamanzi ngoba amadamu anathisa lelidolobho eyandelwa njalo esegcwele udaka.

Uhlelo lokudonsa amanzi esuka kuZambezi esiya koBulawayo olweMatabeleland Zambezi Water Project lwaqala ngomnyaka ka1912 kodwa ohulumende abedlulayo abaluphutshisanga. UMnangagwa uthe uzakuba ngumkhokheli wakuqala ukulufeza loluhlelo ngezenzo kungamazwi abantu be Matabeleland bathole amanzi ahlanzekileyo ngomnyaka ozayo.

please wait

No media source currently available

0:00 0:04:43 0:00


Facebook Forum

XS
SM
MD
LG