amalinks wokungena

Breaking News

Ikomishini Ehlolisisa Ukubulawa Kwabantu Ngamasotsha Yethulelwa Udaba Olutshwaqisa Umzimba


Amasotsha atshaya umuntu eHarare mhlaka August 1, 2018.

Ikomishini eyakhethwa nguMongameli Emmerson Mnangagwa ukuhlolisisa udlakela oluqhamuke ngemva kokhetho olwabangela ukubulawa kwabantu abayisithupha libutho iqale ukuthapha ubufakazi ngoLwesibili kulabo ababona loludlakela lusenzakala eHarare.

Omunye wabaphe ubufakazi, uMnu. Lawson Nyanhanda, utshele ikomishini le ukuthi wathi esizwa umbhobho ukhala wazichemela ngokwesaba ngoba wayengakaze awuzwe udubuka umbhobho.

UMnu. Nyanhanda uthe wayezivelela eKaroi engazi lutho wasetshayisana lodlakela lolu. Uthi walaliswa phansi ngesisu ngamasotsha.

Abanye abaphe ubufakazi bagoqela ababemela ibandla leZanu PF kukhetho uMnu. Nyasha Zenda yena uthe watshiselwa imota eyayingabiza inkulungwane ezilikhulu ngabasekeli beMDC kudlakela lolu kanye loMnu. Peter Zimova laye othe wabona abasekeli beMDC behamba betshisa izimota.

Amasotsha atshata umlandeli webandla leMovement for Democratic Change elikhokhelwa nguMnu. Nelson Chamisa eHarare, Zimbabwe, Aug. 1, 2018.
Amasotsha atshata umlandeli webandla leMovement for Democratic Change elikhokhelwa nguMnu. Nelson Chamisa eHarare, Zimbabwe, Aug. 1, 2018.

Inengi lihle lasola okwenzakalayo besithi ikhomishini le yabunjelwa ukuthi ichothoze ibandla leMDC elikhokhelwa nguMnu. Nelson Chamisa hatshi ukuphuma leqiniso ngokwenzakala kuze kubulawe abantu abayisithupha eHarare ngesikhathi kulabanye ababetshengisela besola ukungethulwa ngesikhathi impumela yokhetho lukamongameli olwaluqhutshwe mhlaka 30 ngoNtulikazi.

UMnu. Mlindela Moyo uthe uhulumende uzama ukuncindezela abantu abaphikisa uhulumende kaMongameli Emmerson Mnangagwa.

Abantu abanengi bathi ngenxa yokungaqedakali kokwenziwa yikhomishini le, kusobala ukuthi akusoze kuphume lutho olutsha ngokubulawa kwabantu ngamasotsha ayehlome aphelela.

Lokhu kusekelwe nguMnu. Thabani Sneke othe abakukhomishi le ngabantu abazakala ukuthi bakucele likaMnangagwa onguye owalaya abakubutho ukuthi badubule abantu ababetshengisela bekonona ngokuphuza kokwethulwa kwempumela yokhetho.

Udaba Esilethulelwe NguGibson Bhebhe
please wait

No media source currently available

0:00 0:03:17 0:00

UMnangagwa, ekhuluma ngekhefu lokukhumbula amaqhawe alwela inkululeko yelizwe leZimbabwe, wathi udlakela lolu lwenziwa ngabalandeli bebandla leMDC elikhokhelwa nguChamisa.

Kodwa-ke uChamisa wakuphika lokhu esithi ibandla lakhe kalizange lithathe isinqumo sokuthi abantu batshengisele emigwaqweni besola ukungethulwa ngokushesha kwempumela yokhetho lukamongameli.

Inhlanganiso ezizimele zodwa zithi kwafa abantu abafika itshumi abadutshulwa ngamasotsha kodwa uhulumende uthi bayisithupha.

Facebook Forum

XS
SM
MD
LG