UMongameli Emmerson Mnangagwa ukhangelelwe ukuthi uzakwethekelela amazwe amahlanu kusukela ngeviki ezayo.
Uzaqala ngokuya kwele Russia abesesiya eBelarus, Azerbaijan, Kazakhstan lele Switzerland lapho azahlangana lenkokheli yakwamanye amazwe emhlanganweni omkhulu obizwa ngokuthi yiWorld Economic Forum.
Amabandla aphikisayo athi inhambo zikaMnangagwa kazisoze zincede ilizwe leZimbabwe elilomnotho osubhidlika. Athi kumele alungise okuhluphayo elizweni engakhangelani lokwethekelela amazwe atshiyeneyo.
Kodwa uhulumende uthi kuqakathekile ukuthi uMnangagwa ethekelele amanye amazwe ukwenzela ukuthi kutholakale imali yakwamanye amazwe okuthiwa ngeSilungi yi-foreign direct investment, yokuthuthukisa umnotho welizwe leZimbabwe.
Kasenelisanga ukukhuluma lesikhulumeli sikamongameli uMnu. George Charamba ngodaba lolu.
UMnu. David Ndlovu, okudale leCentral Committee kubandla leZanu PF, uthi kulungile okwenziwa nguMnangagwa ngoba kumele azame ngamandla akhe wonke ukuthi avuselele ubudlelwano belizwe leZimbabwe lamanye.
Kodwa uMnu. Edwin Ndlovu, umsekeli wesikhulumeli sebandla leMDC koBulawayo, uthi uMnangagwa udlalisa imali ngenhambo zakhe esezedlula amatshumi amabili selokhu wangena esikhundleni sikamongameli ngomnyaka ka2017.
