USikhwicamfundo uJonathan Moyo, owabaleka eZimbabwe ngesikhathi owayengumongameli uRobert Mugabe esuswa embusweni libutho ngomnyaka ka2017, uthi selidilika ibandla leZanu PF njalo lebutho selihlamukele uMongameli Emmerson Mnangagwa.
UMoyo, owethule lokhu ngoMgqibelo kungxoxo ayenze lephephandaba leNewsDay, uthi ukuxokozela kubandla leZanu PF kubangwe kakhulu yikuphenduka eZimbabwe komsekeli kamongameli, uRetired General Constantino Chiwenga, obeselatshwa isifo esingaziwayo kwele China okwenyanga phose ezinhlanu.
Uthi ukungamukelwa kuka Chiwenga emagcekeni endizamtshina eRobert Gabriel Mugabe International Airport ngumongameli labanye abalandeli bebandla leZanu PF leziphathamandla zika hulumende ngeviki ephelileyo, kuveza ukuthi bayalwisana okumangalisayo abantu kubandla elibusayo.
“Okwenzakala emagcekeni endizamtshina kuveza ukuthi ilizwe leZimbabwe selizimvuthu esingathi yibanana republic. Kungeke kwenzakale elizweni elibuswa ngemfanelo ukuthi umsekeli kamongameli oqakatheke kangaka obegula aphenduke elizweni ethwelwe yindizamtshina yakwele China njalo ahlangabezwe ngomunye wabamele iChina eZimbabwe kungela ngitsho iziphathamandla zikahulumende weZimbabwe kumbe abakubandla elibusayo. Lokhu angizake ngikubone kusenzakala.
“Iqiniso yikuthi ilizwe leChina belisebenzisa amandla wonke liveza ukuthi ilizwe leZimbabwe lingaphansi kwalo njalo lenza umathanda.”
UMoyo uthi selidilikile ilizwe leZimbabwe. “… Sokusele ugebhezi nje kuphela … Okusobala yikuthi kwethuse abanengi ukuphenduka kuka Chiwenga okhanya engani uselesithunzi njalo uselesimo sikamongameli kulandela ukwelatshwa kwakhe kwele China. Ukuza kwakhe sokwethuse abantu abanengi kubandla leli. Abanye bathithibele. Kuyakhanya ukuthi sokulomunye ‘umdlalo’ omutsha owezombusazwe owenzakalayo, esesikumelele yikuthi kuzakwenzakala njani.”
Uthi ibandla lebutho elasusa uMugabe esikhundleni selihlamukele uMnangagwa labanye bakhe.
“Ngibona engani selibhidlika ibandla leZanu PF. Kusobala ukuthi ibutho kalisasekeli ibandla leli njalo kaliselandaba lokwenzakala kubandla leZanu PF.”
Uthi uMnangagwa kazi lutho ngokukhokhela abantu njalo uzondwa nguzulu.
“… Kazi lutho ngokukhokhela abantu. Kalabantu abamsekelayo. Kalampande kwezombusazwe. Kalabantu abamsekelayo abakudale lephalamende, kalabantu kubandla leZanu PF ngaphandle kwabantu bosendo lwakhe, kasekelwa libutho labosomabhizimusi.”
Uphinde watshela iphephandaba leli ukuthi uChiwenga laye kasekelwa ngabantu abanengi.
“Nxa sikhangela uChiwenga siyabona ukuthi kasekelwa ngabantu abanengi. Usekelwa libutho njalo wakhankasela ukuthi kuvotelwe abalandeli bebandla leZanu PF abangena edale lephalamende. Kasekelwa nguzulu njengalokhu okwenzakala kuMnangagwa. UChiwenga ubonwa njengomuntu oweba impumela yokhetho lukamongameli okwanqoba uNelson Chamisa webandla leMDC. Lokhu kwanceda uMnangagwa (owacina sokuthiwa nguye onqobileyo ngumthethwandaba).
Asenelisanga ukukhuluma loMnu. George Charamba, isikhulumeli sikaMnangagwa, kanye loMnu. Simon Khaya Moyo, isikhulumeli sebandla leZanu PF, ngoba bebengaphenduli omakhalekhwikhwini babo.