amalinks wokungena

Breaking News

'UMnangagwa Kasoze Alungise Okunengi Okubhekane leZimbabwe'


Abangene umhlangano oqoqwe lidale leCongress eMelika babalisa uSenator Cory Booker, uSenator Flake, UMnu. Nelson Chamisa, uMnu. Tendai Biti, uMnu. Peter Godwin loMnu. Dewa Machinga

Ezinye izizalwane zeZimbabwe ezihlala kwele Melika zithi kaziboni ukuthi uMongameli Emmerson Mnangagwa uzakwenza ukhetho olubalulekileyo ngomnyaka ozayo ngenxa yokuthi wayekuhulumende kaMongameli Robert Mugabe owayelwisana lamazwe entshonalanga.

Bethule lokhu ngoLwesibili ngesikhathi kusenziwa umhlangano obuqoqwe luhlangothi lweCongress yeMelika olubona ngokwenzakala kuzwekazi leAfrica olwe Congressional Committee on Foreign Relations.

Kodwa-ke ilunga lebandla le Zanu PF, uMnu. Frenk Guni, uthi sokusiba lenguquko kwezombusazwe lezomnotho eZimbabwe.

“Kunengi okwenzakala kwele Zimbabwe khonamanje okunjengokulungisa indlela yokuqhuba ukhetho. Singasoli konke okwenziwa nguMnangagwa ngoba kukhona okuhle akwenzayo.”

Omunye walabo abathandabuza ukuthi kuzakuba lenguquko eZimbabwe nguNkosikazi Monica Muzezewa othi kunengi okumele kwenziwe nguhulumende kaMnangagwa ukuze kuguqulwe konke okubi okwenziwa nguMugabe.

“Angiboni ukuthi kukhona okuzalungiswa nguMnangagwa njengoba wayevele esebenza loMugabe."

Lokhu kugcizelelwe nguMnu. Muzi Ncube owebandla leMDC-T othe uMnangagwa usadinga idlela yokulungisa okuhlupha uzulu lobanje kusobala ukuthi kasoze enelisa ukuqeda inkinga ezihlangana lozulu.

Kulabanye abakhuthaza ukuthi kubelenguquko eZimbabwe ezakenza ukuthi ilizwe lelo lidlelane kahle leMelika lamanye.

Omunye wabo nguNkosikazi Stephanie Sullivan, okuhlangothi lukahulumende weMelika olubona ngokudlelana lamanye amazwe olwe Department of State.

“Kasikaguquli indlela esidlelana ngayo lelizwe leZimbabwe. Kunengi okumele kwenziwe nguhulumende weZimbabwe singakaqalisi inhlelo ezintsha lelizwe lelo.”

Ilizwe leMelika lafakela eleZimbabwe izijeziso zenotho likhonona ngokwephulwa kwelungelo likazulu nguhulumende kowayengumongameli uMnu. Robert Mugabe.

Facebook Forum

XS
SM
MD
LG