amalinks wokungena

Breaking News

UNkosikazi Auxillia Mnangagwa Unika Isibhedlela seMpilo Izipho Ezitshiyeneyo


UNkosikazi Auxillia Mnangagwa ukhuluma lezisebenzi labaphathintambo besibhedlela seMpilo.

Umkamongameli welizwe, uNkosikazi Auxillia Mnangagwa, ngoLwesine wethekelele isibhedlela seMpilo koBulawayo lapho anikeze khona izipho ezehlukeneyo ezigoqela iklinika eyibhasi, inhlanyelo yezilimo zesivande kanye lokudla.

UNkosikazi Mnangagwa uthe uyathokoza kakhulu ukuthi uyenelisa ukunceda abantu abangaphilanga kahle.

Uthe uze ephatheke ngokuthi abone ukuthi abantu abagulayo bayathola ukudla njalo badle izilimo zengadi ezilonhlozi ngakho uzelosaba lwezilimo lezi. UNkosikazi Mnangagwa ukhuthaze ibhedlela seMpilo ukuthi siqinise imizamo yokuthi sithole ukudla, okuvela emisebenzi efana lokuzilimela.

UDokotela David Parirenyatwa laye ubekhona kusethulwa izipho eMpilo Hospital.
UDokotela David Parirenyatwa laye ubekhona kusethulwa izipho eMpilo Hospital.

Uthe ungomunye walabo abakhuthalele ukulwisana lomkhuhlane wemvukuzane, ethi uzulu kumele ahlolwe lumkhuhlane njalo iklinika ayinikezileyo izakuya lemaphandleni kuhlolwa abantu imvukuzane. Etsho lokuthi yena uhlolwe izolo.

Umpathintambo wezempilakahle, uDokotela David Pagwesese Parirenyatwa, uthe isibhedlela seMpilo sesisidala kakhulu ethi sakhiwa ngomnyaka ka1957, ngenjongo yokuthi sisetshenziswe ngabensundu kuthi iUBH yayingeyamakhiwa.

Ubandlululo lwamiswa ngomnyaka ka1980 ilizwe lithola uzibuse. Ucine ngokuncoma uNkosikazi Mnangagwa ngomsebenzi wakhe wokunanza amalungelo abomama labantwana abahlala besalele emuva.

Uqhubeke ethi uNkosikazi Mnangagwa ukhankasa kabanzi lokulwisana lomkhuhlane wemvukuzane ikakhulu kubomama ethi imhlobo yemvukuzane emithathu eyebele, eyesibeletho kanye leyabobaba (prostrate cancer) yiyo ebulala abantu kakhulu eZimbabwe.

Ezinye izipho ezinikwe isibhedlela seMpilo
Ezinye izipho ezinikwe isibhedlela seMpilo

Umphathintambo wesabelo sako Bulawayo uNkosikazi Angeline Masuku laye uncome uNkosikazi Mnangagwa ethi ukukhetha kwakhe ukuqala uhlelo lwakhe koBulawayo kutsho ukuthi leli dolobho libusisekile kakhulu ngoba elenyanga ezimbili kuphela eqale umsebenzi. Ethi uNkosikazi kamongameli uphe isibonelo esihle ngokukhokhela ekuyahlolweni umkhuhlane wemvukuzane izolo emini.

UNkosikazi Mnangagwa uqale ngokuvakatshela isibhedlela seUnited Bulawayo Hospital-UBH, izolo lapho ahlolwe khona umkhuhlane wemvukuzane ngakhoke namhla ubeseMpilo.
Emkhosini lo izethekeli zincome kakhulu isibhedlela seMpilo bethi imizamo yabo yokuthi isibhedlela sisebenze ngendlela iyabonakala laloba isimo selizwe singamanga kuhle.
Isibhedlela seMpilo sibusisekile ngoba nanku lohulumende laye usenanzelele ukuthi kumele sithuthukiswe ngemva kwemizamo eyenziwa zinhlanganiso ezizimeleyo labanye abancedisa kulesi sibhedlela ikakhulu izizalwane zeZimbabwe ezisemazweni afana leNgilande abalenhlelo ezinengi zokuncedisa ukuthuthukisa lesi sibhedlela.

Facebook Forum

XS
SM
MD
LG