Sokuyisiphithiphithi salabo abakhankasela ukhetho asebegijima le lale bedinga usekelo ngesikhathi usuku lokhetho solusondela.
Loba nje kungasensuku zatshwala iZimbabwe ikhangelelwe ukuqhuba ukhetho, labo abancintisayo lokhu bebhoda bedinga usekelo endaweni ezitshiyeneyo.
Abanye ngababhoda ngemizi kuthi abanye bahlangana lezakhamizi embuthanweni eqoqwa zinhlanganiso ezizimeleyo.
NgoLwesine abanye abazancintisa kukhetho bahlangane lezakhamizi zeGwanda emhlanganweni obuqoqwe yinhlanganiso yeCommunity Youth Development Trust CYDT kanye leWomen’s Institute for Leadership Development (WILD).
UMnu. Jackson Lunga, owebandla elisacathulayo eleZimbabwe Partnership for Prosperity, uthe angakhethwa ukuba ngumeli weGwanda Central edale lephalamende uzahuga osomabhizimusi bakuleli abasemazweni.
“EGwanda khonala silabafowethu. I was previledged ukuthi ngike ngayabona abanye bakhona abalamamillions and millions of dollars okokuthi bangabuya back bezo investor khonalapha eGwanda singakadingi amakhiwa, kuthwa kufuneka ama investor angamakhiwa silabo abantu abamnyama izizalwane zeGwanda ezingabuya khonapha zizo investor zithuthukise iGwanda ibengeyinye indawo emangalisayo but those people are not coming, why, ngoba kulamasela kuhulumende.”
Omunye oncintisa eGwanda Central nguMnu. Brian Ndlovu womanyano wePeople’s Rainbow Coalition yena uthi ukhathazekile ngokusilela kwezikolo kulumhlubulo.
UMnu Thaphi Ncube, oncintisa kukhetho elilunga elizimeleyo kuWard 14, uthe izakhamizi zibhekane lodubo lwamanzi lokusilela kwemisebenzi.
“IWard 14 yindawo elamanzi amanengi kakhulu kodwa aphansi akula zibhorane laphayana okunye sifuna ukuthi sikhangele intuthuko ekhona laphana kuWard 14, kulabantwana abanengi abangasebenziyo ikanti ikhona imizamo esingayenza siyicommunity sikhangele kumayouth ukuthi abantwana babelemisebenzi abangayenza ngezandla sikhangelele amaproject.”
Kusenjalo amalungiselelo okhetho asekuzinga eliphezulu njalo labo abazavotisa sebeqalile ukufika lapho abazavotisela khona.
IZimbabwe izaqhuba ukhetho ngoMvulo mhlaka 30 July lapho uzulu azavotela khona uMongameli welizwe, abameli bedale lephalamende kanye lamakhansila.