UMnu. Sybeth Musengezi, osanda kuphanyeka emthethwandaba udaba lokuthi uMongameli Emmerson Mnangagwa kumele asuswe ukuba ngumkhokheli webandla leZanu PF, uthi ulethemba lokuthi idale leHigh Court lizakwenza lokhu akucelayo ngoba ilizwe leZimbabwe likhokhelwa ngumuntu owangena ngudlu esikhundleni sikamongameli.
UMusengezi uthi kathunywanga licele leZanu PF elibizwa ngokuthi yiGeneration 40 elalikhokhelwa nguNkosikazi Grace Mugabe ibutho lingakasusi umuyi uRobert Mugabe esikhundleni.
Uthi idale leCentral Committee elangenisa uMnangagwa esikhundleni ngomnyaka ka2017 lalingelalungelo lokwenza lokhu ngoba akulandelwanga isisekelo sombuso webandla leli.
UMusengezi uthi uMnangagwa ulakho ukuncintisa kukhetho lukamongameli nxa kungenziwa umhlangano weCongress oqoqwe kulandelwa isisekelo sombuso webandla leZanu PF.
“Sifuna ukuthi kubuyelwe kulokhu okwakukhona ngoLwezi ngomnyaka ka2017. Kumele kwenziwe umhlangano weCentral Committee ozadinga umkhokheli webandla leli omutsha hatshi lokhu okukhona okwamanje okulomuntu owafakwa ngabangani bakhe. Loba wanqoba kukhetho ngomnyaka ka2018, kangenanga kahle esikhundleni. Umthethwandaba ungasinika esikufunayo, sizamxotsha sidinge omunye ongasikhokhela.”
Kasenelisanga ukuxoxa ngodaba lolu loMnu. Patrick Chinamasa, uMnu. Obert Mpofu labanye abakubandla leli.
UMnu. Believe Gaule, umsekeli webandla elibusayo, uthi uMusengezi kazi lutho ngokwenzakala ngomnyaka ka2017 uMugabe esuswa esikhundleni.