UMongameli wakwele South Africa usekhethe abantu ababili abaqakathekileyo ozabathuma kwele Zimbabwe ukuthi bayehlolisisa okwenzakala kulelolizwe okulabantu ababotshwa lokutshaywa mahlayana nguhulumende kaMongameli Emmerson Mnangagwa.
UMnu. Cyril Ramaphosa, osanda kwethula umbiko ebulenjini bokuxhumana obeTwitter, uthi usekhethe uDokotela Sydney Mufamadi loNkosazana Baleka Mbete ukuthi bayehlolisisa imibiko eveza ukuthi kulokuxokozela kwezombangazwe eZimbabwe.
Uthi UMufamadi loMbete bakhangelelwe ukuthi bazakhulumisana leziphathamandla zikahulumende, abakhokhela amabandla atshiyeneyo, abazimele bodwa labanye ngokwenzakala eZimbabwe.
Uthi bazahamba kulelolizwe kungalungiswa konke okufaneleyo.
UMufamadi wake wakhokhela uhlangothi lwezemadolobho kanye lolwezendaba zekhaya kuthi-ke uNkosazana Mbethe wake waba ngumsekeli kamongameli, usomlomo wedale lephalamende njalo lomgcinisihlalo webandla leAfrican National Congress.
Kasenelisanga ukukhuluma ngodaba lolu leziphathamandla zelizwe leZimbabwe.
Sokulabantu abedlula amatshumi ayisithupha - 60 asebebotshiwe eZimbabwe abanye batshaywa kabuhlungu kulandela ukuqoqwa kokutshengisela obekumele kwenziwe mhlaka Ntulikazi 31 uzulu ekhonona ngobukhohlakali lokunye.
Uhulumende uthi ababefuna ukutshengisela yizikhohlakali ezisetshenziswa ngamazwe entshonalanga. Amasotsha lamapholisa bavala ngci ilizwe besithi akuvunyelwa ukutshengisela ngesikhathi uhulumende ezama ukuvimba ukumemetheka komkhuhlane weCOVID-19.