Inkulungwane lenkulungwane zabantu abadabuka kwele Zimbabwe abahlala eBhilithane ngempelaviki bathe gwaqa emcimbini weZimfest owenziwa minyaka yonke.
Lumkhosi ubuthanisa abantu bejabulela isiko lalapho abadabuka khona, begida behlanganiswa yikudla lomculo wasekhaya.
Umcimbi lo uhlezi ukhangelelwe ngabanengi minyaka yonke ngoba wenziwa ngesikhathi sokutshisa njalo abantu bavame ukuya kuwo bezimuli, izihlobo labangane.
Lonyaka wenzelwe kwelinye ipulazi eliseduze ledolobheni leLondon eleColsdale. Abaculi abajabulise abantu bagoqela uThomas Mapfumo, Winky D, Busi Mhlanga, Enzo Ishall, Dj Zinhle wakwele South Africa labanye abakoBulawayo asebehlala eBhilithane.
UTsungai Tsikirayi ngomunye wabathakazelele umcimbi walonyaka.
"Iprogramm eyalonyaka ibijabulisa kakhulu ngoba bekulabantu besifazane abanengi ukwedlula imnyakedluleyo. For the past years vele bekunzima ukuthi abafazi betholakale bayibo abakhokhelayo or bengamasaphothingi acts. Bekunzima esikhathini esedluleyo kodwa-ke iZIMFEST lonyaka iskhumbulile.”
USisa Senkosi, omunye umculo obekhona emcimbini lo, usekela okwethulwe nguTsungai.
"Sikholisile kakhulu kakhulu kabanzi estejini lapha, abantu bebebanengi akade bezobukela abalandela imculo yethu yabantu baseZimbabwe silabanye ababuyileyo bevela ekhaya eZimbabwe labanye abavele behla lapha"
UBusi Mhlanga, laye ongumculi, uthi kumele kuqakathekiswe abaculi bonke beZimbabwe kungabi lenkethabetshabi.
"Kuhle kakhulu ukuthi khonakhona uphefomele abantu bakini kodwa uyazi ukuthi kubuhlungu kodwa ngenye indlela ngingakufaka ngokuthi kubuhlungu ngob, kukhanya engani thina abantu baseMatebeleland asiqakathekiswa kakhulu lapha kuZimfest. Singabantu beZimbabwe, singabantu banye. EZimbabwe kulaMaNdebele kulamaShona, kulaMaKhalanga, kulaMaTonga, kulayo yonke imihlobo lathi sifuna ukuthi siqakathekiswe.”
Abantu ababuye kulumcimbi abanjengoMnu. Bekithemba Fuyana labo bafakaza ngenjabulo ebekhona kulumcimbi.
"Into engithabise kakhulu mina namba one njengomjida ngikholise ukudla. Bqkulungiswe okwedlula eminye iminyaka.”
UMnunzana Sipho Gumbo, ohlala edolobheni leLondon, uthi owalonyaka umcimbi weZIMFEST ubuphambili.
"Lapha eZIMFEST ngibuye lonkosikazi labantwana. Lonyaka iZIMFEST ngithande ivenue yakhona. Kuhle kakhulu lapha. Kukhatshana lezindlu zabantu njalo kunengi okumnandi lokwenziwayo okugoqela amaDJs.”
UNkosazana Nomsa Mlilo simthole egida okwamagama, sokuncane indawo. "Mina ngikholise ukubona abaculi kanye lamaDJs. Engikubonileyo yikuthi abantu bajabule okumangalisayo emcimbini lo obuqoqwe kahle. Abahamba labantwana labo bekukhanya bekholisa kakhulu.”
Baqolotshe abantu, abanye bahlangana bengabantu abacinana kudala, kwadliwa, kwawoswa inyama, kwagidwa, kwanathwa kungabizwa ozwayo kumcimbi Zimfest ka2019.
Silethemba abaqoqa lumcimbi minyaka yonke bazabe lokhu bethuthukisa ukuhlelwa kwawo ngoba owalonyaka abantu abanengi bebefakaza ukuthi ngempela ubumuhle.
