Uhulumende weZimbabwe usekhuphule intengo yamafutha ezimota ngesikhathi amafutha la esilela elizweni.
UMongameli Emmerson Mnangagwa, owethule lokhu ngoMgqibelo, uthe abantu bazakwenelisa ukuthenga amafutha la ngemali etshiyeneyo.
“Kusukela emadabukakusa ipethulo isizathengwa nge$3.11 kusilinganiso se-litre kuthi amafutha awe diesel asezakuba yi$3.31 kusilinganiso se-litre. Intengo le izabe ihambelana lesisindo sama dola eMelika sesilingana lama bond notes. Sikhuphule intengo le sinanzelela ukuthi abathengisa amafutha la kumele labo besale belakho abakubambileyo bengawathengisa.”
Amafutha eDiesel abethengiswa nge$1.38 kuthi ipethulo ibithengiswa nge$1.43 kusilinganiso se-litre uMnangagwa engakethuli intengo entsha yamafutha ezimota.
UMnangagwa uthe akumelanga abathengisa impahla bahle bekhuphule intengo kulandela okwenziwe nguhulumende.
Uphinde wathi kukhanya engani kulabantu asebefuna ukuthi kube lokuxokozela eZimbabwe ngenxa yokusilela kwamafutha ezimota.
“Asifuni kukuzwa lokhu osokusenzwa ngabanye abantu.”
Amafutha ezimota ayasilela kwele Zimbabwe ngesikhathi umnotho ubhidlika okumangalisayo.