Ngesikhathi kusenziwa umkhankaso wokunanza amalanga alitshumi lasithupha wokwenqabela udlakela, ikakhulu oluqondiswe kwabesifazana kanye labantwana, abanye omama abeZimbabwe abahlala kwele Botswana, bathi abangaphandle kwelizwe labo babhekana lobunzima kuloludaba lokuhlukuluzwa kwabo mama.
Umkhankaso wokwenqabela udlakela emulini, owe16 Days Activism Against Gender Based Violence, usungulwa kulokukhathazeka ngokumemetheka kokuhlukuluzwa kwabesifazane, ikakhulu udubo lokudlwengulwa.
EleBotswana libhekane ikakhulu lodubo lwabesilisa ababulala abesifazana, ikakhulu abayabe bethandana labo.
UMongameli Mokgweetsi Masisi uthi kuqakathekile ukuthi ilizwe lakhe liliswane lokumemetheka kokuhlukuluzwa kwabesifazana, ngazo zonke indlela.
“Njengelizwe, asingeke sabe savika ukuthi udlakela kubomama, seluqele lwangena kuzo zonke indawo zesizwe.”
Abanye omama, abafana loNkosikazi Emily Dube, bathi ukuba ngowesifazana phandle kwelizwe, ikakhulu lapho utshiye usekelo olufana lolwemuli emuva, kulukhuni.
“Omama babhekane lazo zonke indlela abahlukuluzwa ngazo, njalo kubanzima uma ungaphandle kwelizwe. Uthola ukuthi kwesinye isikhathi noma kulokuhlukunyezwa, akula lapho ongaya cebela khona.”
UNkosazana Sindiso Sibanda uthi omama kunengi ababhekana lakho imihla ngemihla, ikakhulu kulenzi nsuku sekuqonge amacala okudlwengulwa kwabesifazane.
“Thina singabantu abangomama asizizwa sikhululekile uma sihamba, kumbe sikwezinye indawo nje. Kulamacala amanengi abomama bedlwengulwa, kulamacala abomama bebulawa ngabantu besilisa. Kusenza singakhululeki.”
EleBotswana lilenani eliphezulu labesifazane abadlwengulwayo, njalo amacala abesilisa ababulala izithandwa zabo, aya eqonga.
Lokhu kudala ukuthi omama, okugoqela abavela kwamanye amazwe afana leZimbabwe bengahlaliseki ngesimo phezu kwempilakahle lenhlalakahle yabo.