UMongameli Donald Trump uthi uzakwenza umhlangano lamalunga edale leCongress ngoLwesithathu eWhite House lapho azakhuluma khona ngemali yokwakha umduli wokuvimba abantu abangena kwele Melika okungekho emthethweni emngceleni welizwe leli lele Mexico.
Okwethulwe nguTrump kuchothozwe ngamalunga ebandla lama Democrats athi uTrump ukhuluma angakwaziyo.
UTrump wethule lokhu ngoLwesibili ntambama eWhite House embikweni wakhe oqakathekileyo lapho abekhuluma ngokuvalwa kwezinye inhlangothi zikahulumende langemali yokwakha umduli emngcweleni wamazwe la.
“Silakho ukuthi silungise udaba lolu okwesikhatshana esifika phose imizuzu engamatshumi amahlanu - 45 minutes. Sengicele ukuthi amalunga edale leCongress abuye eWhite House ukwenzela ukuthi silungise udaba lolu.Silakho ukuhlala phansi ndawonye silungise ezomvikela emgceleni welizwe lethu.”
UTrump uthe kuyamangalisa ukuthi kulabanye abantu abachothoza umbono wakhe wokwakhe umduli athi uzavimba abokuza ukuthi bangangeni kwele Melika okungekho emthethweni.
“Abanye bathi akuqondanga ukuthi sakhe umduli kodwa okumangalisayo yikuthi abantu abalezikhundla eziphezulu balemiduli ezindlini zabo.Abafakanga umduli ngenxa yokuthi bazonda abantu abaphandle kodwa bathanda abaphakathi.”
UTrump uthi amalunga ebandla lama Democrats kawafuni ukuthi kuvinjwe abantu abangena kwele Melika ababulala abantu makhaza. Uthe umgcele osezansi kwelizwe leMelika ungenisa izidakamizwa ezimangalisayo.
“Umgcele lo ungenisa izidakamizwa ezinengi ezinjenge meth, heroine, cocaine le fentanole.”
Uthe kulabantu abanengi okumangalisayo abangena emngceleni welizwe leMelika lele Mexico okwenza ukuthi azame ngamandla wonke ukuthi kuvinjwe ngokwakha umduli.
“Emnyakeni emibili edluleyo uthi kulabantu abanengi ababotshwe bezama ukungena elizweni leMelika okugoqela izikliwi labathengisa izidakamizwa.”
Uphinde wathi kulabantu abanengi kwele Melika ababulawa ngabantu bokuza abangena okungekho emthethweni kwele elizwe.
“Inkulungwane ezinengi zabantu ziyabulawa ngabantu laba.banengi okumangalisayo abazabulawa nxa kungalungiswanga lokhu.”
Uthe ama Democrats afuna kubelomduli owakhiwe ngensimbi.
“Okucelwe ngama Democrats yikuthi kumele kube lensimbi ezizafakwa emgceleni hatshi umduli. Kuyafunakala kakhulu lokhu. Abavikela ilizwe emgceleni labo bathi kuyafunakala lokhu.”
Kodwa-ke ama Democrats amelwe nguNkosikazi Nancy Pelosi okudale leHouse of Representatives loSenator Chuck Schumer athi uTrump ukhuluma angakwaziyo njalo usenga ezimithiyo ngomgcele awufunayo.
USchumer uthe kulabantu abanengi abasebenza kuhulumende abathwele nzima abangatholi iholo ngakho-ke uTrump kumele avule uhulumende oselesikhatshana evaliwe.
“UMongameli Trump oseyehlulekile ukuthi ilizwe leMexico libhadalele umduli wakhe uvale uhulumende weMelika ukwenzela ukuthi athole imali yakhe yokwakha umduli.”
UNkosikazi Pelosi uthe okuseleyo nje yikuthi uTrump avule inhlangothi zikahulumende.
“Umongameli Trump kumele ayekele lokhu akwenzayo avule uhulumende. Asibusi ngokuba lolakha lokuthi umongameli sokumele atshaye itafula ukwenzela ukuthola akufunayo. UTrump ufuna ukubusa ngokwethusela hatshi ukuvikela uzulu.
“Ukuvalwa kukahulumende kuzwisa ubuhlungu izisebenzi njengoba imuli ezidinga imali yokuthenga izindlu zingayitholi njalo labalimi kabasoze bathole imali yokulima.”
Ngakho-ke uthe uTrump kumele avule ukulumende ngokutshetsha.
