UNkosikazi Grace Mugabe usephanyeke emthethwandaba udaba lokuthi kumele kugejwe amathambo kamuyi uRobert Mugabe, owangcwatshwa egumeni lakhe eKutama ngomnyaka ka2019.
UNkosikazi Mugabe uthi akukho emthethweni okwenziwe yinduna uZvimba ngoba kalamandla okuphuma lezinquma azenzayo, ngakho-ke ufisa ukuba kuhlolisiswe konke akwethuleyo.
Kasenelisanga ukuxoxa lenduna uZvimba ngodaba lolu ngoba ubengaphenduli umakhalekhukhwini wakhe.
UNkosikazi Mugabe uthi induna le kayimnikanga ngemfaneli amasamanisi njalo wamgweba engakathonisi icala leli. Wagwetshwa ukuba ahlawule inkomo lembuzi.
Uhulumende wavumela umdeni wako Mugabe ukuba umgcwabe eKutama hatshi eNational Heroes’ Acre okwakusakhiwa isihonqo okwakumele angcwatshwe khona.
Akwaziwa ukuba uZvimba uzakwenzani ngodaba lolu.
Kusenjalo, abantwana baka Mugabe labo sebephanyeke emthethwandaba udaba lolu besithi akukho emthethweni okwethulwa nguZvimba.