Selitshontshiwe ilitshe elifakwe ngoLwesibili eBhalagwe esigabeni seMaphisa esabelweni seMatabeleland South, elesikhumbuzo sabantu ababulawa yiGukurahundi.
UMnu. Mbuso Fuzwayo, umqondisi wenhlanganiso yeIbhetshu Likazulu, uthi ilitshe leli elethulwe ngezinye induna zeMatabeleland, litshontshwe ebusuku ngoLwesibili.
Lokhu ngokwesibili kuleyondawo ukuthi kutshontshwe ilitshe lesikhumbuzo sababulawa yiGukurahundi.
Kulabantu abanengi abaphoselwa emigodini eBhalagwe yiGukurahundi kusukelwa ngomnyaka ka1983 kusiyafika umnyaka ka1987.
UMnu. Mqondisi Moyo, owebandla leMthwakazi Republic Party, uthi abantu abathethe ibhakani leli badlelana lebandla elibusayo.
Kodwa uMnu. Elifasi Mashaba, okubandla leZanu PF, uthi kumele abantu bebambisane lohulumende ekwenzeni izikhumbuzo zabantu ababulawa ngesikhathi seGukurahundi.
Inhlanganiso yeCatholic Commission for Justice and Peace yaloba ugwalo olujulileyo olwaveza ukuthi iGukurahundi yabulala abantu abazinkulungwane ezingamatshumi amabili - 20,000 ababecatshangelwa ukuba basekela abahlamuki eMatabeleland leNkabazwe.
Abachothoza okwenzakala ezabelweni lezi bathi bedlula inani leli ababulawa mahlayana yiGukurahundi, okwakukhanya engani ifuna ukubulala abantu abanengi okumangalisayo abadabuka ezabelweni lezi ababesekela ibandla leZapu.