amalinks wokungena

Breaking News

UDabengwa Uthi uMugabe Ukhuluma Angakwaziyo Ngombhuqazwe weGukurahundi


UMnu. Dumiso Dabengwa uthi uMnu. Robert Mugabe ukhuluma angakwaziyo.
UMnu. Dumiso Dabengwa uthi uMnu. Robert Mugabe ukhuluma angakwaziyo.

Annastacia Ndlovu

Umkhokheli webandla leZapu, uMnu. Dumiso Dabengwa, uthi owayengumongameli weZimbabwe, uMnu. Robert Mugabe, kakhulumi iqiniso nxa esithi ibandla leZapu laMaNdebele benza ukuthi kubelombhuqazwe weGukurahundi.

UDabengwa, owayekhangelane lezomvikela njalo ezabacuphi kubandla leZapu njalo lebutho leZipra ngesikhathi sempi yenkululeko, uthi uMugabe ukhuluma amanga aluhlaza tshoko langokubotshwa kwakhe ilizwe leZimbabwe lisanda ukuthola uzibuse.

Uthi kulembali yodaba lwakhe emthethwandaba ngakho-ke wonke umuntu ofisa ukuyibona ulakho ukuya emthethwandaba ayezibonela ukuthi uhulumende wayezamani.

UDabengwa watholakala engelacala aze athoniswe emthethwandaba lapho ayecatshangelwa ukuthi wafihla izikhali zevuyo leZipra ilizwe selithole uzibuse.

Uhulumende wayecabangela ukuthi uDabengwa lomkhulu wevuyo leZipra, uLookout Masuku, owafela entilongweni, babefuna ukugunqula uhulumende wabo bebambisana loMnu. Joshua Nkomo, owayesaziwa ngokuthi nguFather Zimbabwe njalo owayengumkhokheli webandla leZapu.

UMugabe usanda kutshela intathelizindaba ukuthi uDabengwa wadinga izikhali kwele Russia azingenisa eTanzania leZambia wazifihla eHwange.

UDabengwa uthi uMugabe kasakwazi akhuluma ngakho ngenxa yokuthi wesaba ukuthi uzathoniswa amacala okubulala abantu abacatshangelwa ukuthi bafika inkulungwane izingamatshumi amabili – 20,000 – ababulawa libutho leFifth Brigade ezabelweni zeMatabeleland leNkabazwe.

UMugabe uthi ibutho leli lalilwisana labahlamuki abaphiwa imibhobho nguNkomo lebandla lakhe bezama ukugenqula uhulumende wakhe.

UNkomo laye wathi uMugabe wayesenga ezimithiyo ngokugcona ibandla leZapu ukuthi lalisebenzisa abahlamuki ukwenzela ukuthi bagenqule uhulumende webandla leZanu.

Amabandla la acina emanyana ngomnyaka ka1997 okwenza ukuthi kumiswe umbhuqazwe weGukurahundi.

Isakhamuzi sakoBulawayo, uMnu. Samuel Khumalo, uthi uMugabe usekhulile njalo ukugcona kwakhe uDabengwa yikucatsha ngomunwe ngoba bayakwazi abakwenzayo.

Uthi okumele uMugabe akwenze yikuxolisa abantu abonelwayo ngesikhathi sombhuqazwe weGukurahundi.

UMugabe uphinde waveza ukuthi uMongameli Emmerson Mnangagwa wayengomunye walabo ababephithizela ngodaba lweGukurahundi.

UMnangagwa kakaphenduli lokhu okwethulwe nguMugabe.

Udaba Esilethulelwe NguAnnahstacia Ndlovu
please wait

No media source currently available

0:00 0:05:03 0:00

XS
SM
MD
LG