amalinks wokungena

Breaking News

Abantu Bethuswa Nguhulumende kaMnangagwa Othi Uzavula Amavinkili Amasotsha


FILE: Uthatha imifanekiso yentengo yempahla ngesikhathi ethenga akudingayo esitolo eHarare. (AP Photo/Tsvangirayi Mukwazhi)

Abantu abanengi bathi uhulumende kumele alungise umnotho obhidlikayo hatshi ukuvula amavinkili okuthengisela abezomvikela ukudla okulentengo ephansi.

Abakhulume lomsakazo weStudio 7 bathi kuyamangalisa ukuthi uhulumende ufuna ukuvula amavinkili la abantu abanengi behlupheka ngenxa yokugugudeka komnotho welizwe leZimbabwe.

Bathi kwephula inhliziyo ukuthi uhulumende ufuna njalo ukuthi izisebenzi zithathelwe omunye umthelo we-tax okukhanya engani imali yakhona yiyo ezasetshenziswa ukuvula amavinkili amasotsha, amapholisa labanye abezomvikela.

Bathi akuncedi lokuvula isikhwama semali yezisebenzi zikahulumende esizabizwa ngokuthi yiCivil Service Mutual Savings Fund esokunceda izisebenzi.

Omunye wabakhala ngodaba lolu nguMnu. Obert Masaraure, okhokhela inhlanganiso yababalisi eyeAmalgamated Rural Teachers’ Union of Zimbabwe.

“Izitolo zama garrison kabazange basitshele. Sibona ukuthi nxa befuna ukwenza into ezinje kumele bakhulume lathi kuqala. Njengezisebenzi asisoze sikuvume lokhu. Yindlela nje eyokutshontshela ezinye izisebenzi ukwenzela ukuthabisa ezinye. Kuzaxabanisa izisebenzi kuphambanise ukwenziwa komsebenzi.”

Omunye njalo wabakhala ngokuvulwa kwamavinkili abezomvikela lomthelo we-tax nguNkosikazi Mavis Tshuma, ohlala eMabvuku eHarare.

“Uhulumende weZimbabwe useyehlulekile. Njengoba ubona mina nginje ngingumbalisi kangiholi, ngihola ithubhobho. Besekuthwa kuthubhobho yonale ngikhiphe eyinye ngiyenikeza isotsha ukudla. Siswela abameli.”

UMnu. Gideon Shoko, unobhala obona ngezisebenzi kubandla leMDC elikhokhelwa nguMnu. Nelson Chamisa, uthi kuyamangalisa okwethulwe nguhulumende kaMongameli Emmerson Mnangagwa.

“Okumangalisayo yikuthi sekusenziwa izitolo zamasotsha ezizabhadalwa ngezinye izisebenzi. Lakuzwa ngaphi khonokho? Nxa sokubhadalelwa amasotsha kanti ezinye izisebenzi zizakwenza njani? Thina njenge MDC sibona ukuthi uhulumende lo ungani usephambene.”

Kodwa omela abatsha kubandla leZANU PF, uMnu. Munashe Mtutsa, uthi silungile isinqumo esithethwe nguhulumende.

“Into yama garrison shop iqakathekile kakhulu, kutshengisa ukuthi uhulumende uyazi ukuba abantu abakubutho kumele bathenge impahla ngemali ephansi. Akumelanga batshaye ivigoloni labantukazana. Le yinto eyenzakala emazweni wonke jikelele.”

Umphathintambo kahulumende obona ngezemali, uMnu. Mthuli Ncube, uthi bazama ngamandla wonke ukulungisa umnotho obhidlikayo lobanje inhlanganiso yeInternational Monetary Fund isanda kwethula umbiko othi ilizwe leZimbabwe liyazehlulekela kwezokuvuselela umnotho.

Inhlanganiso le ithi eleZimbabwe lidinga imali enengi yokuphandela uzulu ukudla okudalwe yikungavuni kahle emnyakeni emine edluleyo kanye lobukhohlakali obumangalisayo, ikakhulu kuhulumende kaMnangagwa.

Abantu Bakhonona Ngamavinkili Amasotsha Labanye Abezomvikela
please wait

No media source currently available

0:00 0:04:19 0:00


Facebook Forum

XS
SM
MD
LG