Uhlangothi olubona ngokuqhatsha odokotela olweHealth Service Board luthi kuzakubanzima ukudinga abanye odokotela abazasebenza ezibhedlela zikahulumende kulandela ukuxotshwa kwabakhalala umsebenzi abedlula amatshumi ayisikhombisa.
UDokotela Paulinus Sikosana, umgcinisihlalo wohlangothi lolu, uthi balandela umthetho ekuxotsheni odokotela abakhalala umsebenzi bekhonona ngeholo eliphansi.
Uthi kukhangelelwe ukuthi odokotela abangamakhulu amane bazathoniswa amacala okukhalala umsebenzi mhlaka 3 ngoMpandula.
UDokotela Mthabisi Bhebhe, okunhlanganiso yabodokotela eyeZimbabwe Hospital Doctors Association, uthi uhulumende kumele ayekele ukuxotsha umsebenzi odokotela abafuna kukhuphulwe iholo labo.
UDokotela Bhebhe uthi kuyamangalisa ukuthi uhulumende uxotsha odokotela ilizwe lisehluleka ukwenzela uzulu akufunayo.
Umthethwandaba weLabor Court wathatha isinqumo sokuthi kumele odokotela abakhalala umsebenzi babuyele ezibhedlela bakhulumisane lohulumende besemsebenzini.
Kodwa odokotela bathi abalamali yokugada imitshova lamabhasi. Bathi bafuna iholo elilinganiswa lesisindo sedola leMelika emkambo wemali.
Uhulumende uthi kalamali yokubaholisa imali ephezulu.